හිටපු මුදල් අමාත්ය පාර්ලිමේන්තු මන්ත්රී රවී කරුණානායක මහතාට සහ පර්පෙචුවෙල් ට්රෙෂරීස් සමාගමේ අධ්යක්ෂක අර්ජුන් ඇලෝසියස් යන අයට එරෙහිව අල්ලස් කොමිසම විසින් ගොනු කර තිබෙන නඩුව වැඩිදුර සාක්ෂි විභාගය සඳහා ජනවාරි 16 වනදා කැඳවන ලෙස කොළඹ මහාධිකරණය නියම කළේය.
මෙම නඩුව අද (දෙසැම්බර් 12) කොළඹ මහාධිකරණ විනිසුරු මොහොමඩ් මිහාල් මහතා ඉදිරියේ කැඳවනු ලැබූ අතර, එහිදී පැමිණිල්ලේ සාක්ෂි සටහන් කර ගැනීම සිදුවිය. ඉන් අනතුරුව, වැඩිදුර සාක්ෂි විභාගය ජනවාරි 16 වනදා දක්වා කල් තැබීමට විනිසුරුවරයා නියම කළේය.
2016 වසරේ පෙබරවාරි මස 12 වනදා සහ එම වසරේ සැප්තැම්බර් මස 30 වන දා දක්වා කාලසීමාව තුළ මුදල් අමාත්යවරයා වශයෙන් කටයුතු කළ විත්තිකාර රවී කරුණානායක මහතා, අදාළ නඩුවේ දෙවන විත්තිකාර අර්ජුන් ඇලෝසියස් මහතා අධ්යක්ෂවරයෙකු ලෙස ක්රියා කරන පෞද්ගලික සමාගමේ නමට ලබාගෙන තිබූ නිවාස සංකීර්ණයේ පිහිටි නිවසක පදිංචිව සිටීම තුළින් අල්ලස් පනතේ 19 (ඇ) වගන්තිය යටතේ වරදක් සිදු කළේ යැයි අල්ලස් කොමිසම විසින් චෝදනා එල්ල කර තිබේ.
එම කටයුත්තට ආධාර අනුබල දීම සම්බන්ධයෙන් දෙවන විත්තිකාර පර්පචුවල් ට්රෙෂරීස් සමාගමේ අධ්යක්ෂවරයෙකු වන අර්ජුන් ඇලෝසියස් මහතාට එරෙහිව එම කොමිසම විසින් අධිචෝදනා ඉදිරිපත් කර ඇත.
