‘දණ්ඩ නීති සංග්රහය සංශෝධනය කිරීමේ පනත’ සම්මත වුවහොත් අනාගත පරපුර අනාථ වන බවත්, සෑම පාසලකම පොලිස් පෝස්ට් එකක් විවෘත කිරීමට සිදුවන බවත් ආචාර්ය ඕමල්පේ සෝභිත හිමියෝ පවසති.
එම නිසා මෙම පනත වහා හකුළා ගත යුතු බවත්, එසේ නොකළහොත් ඉදිරියේදී ඇතිවිය හැකි අරගලය කිසිවකුට නවතාලිය නොහැකි බවටත් උන්වහන්සේ අනතුරු අඟවා ඇත.
උන්වහන්සේ එසේ පැවැසුවේ ඇඹිලිපිටිය ශ්රී බෝධිරාජාරාම විහාරස්ථානයේ දී පැවැති මාධ්ය හමුවක් අමතමිනි.
වැඩිදුරටත් අදහස් දැක්වූ උන්වහන්සේ, අගමැතිවරිය පවසන පරිදි මෙම පනත පාසල් දරුවන් හා ගුරුවරුන් පමණක් ඉලක්ක කර ගෙනා පනතක් නොවන බව අවධාරණය කළහ.
“පාසල් දරුවන් පමණක් නොවෙයි පිරිවෙන්වල ලබන දරුවන් හා සාමණේර වහන්සේලා, ළමා නිවාසවල ඇති දැඩි වෙමින් අධ්යාපනය ලබන දරුවන් මේ හැමෝම නොවෙයි අධ්යාපනය අයත් වෙනවා. ඒක තමයි අපට තිබෙන ප්රශ්නය. සෑම දරුවකුගේම භාරකරුවන්ට එම පනත සම්මත වුවහොත් සිදුවෙනවා දරුවන් යටතේ කටයුතු කරන්න.”
එම නිසා අනාගත පරපුර වල්මත් කරවන මෙම ‘අශීලාචාර නීතිය’ වහාම ඉල්ලා අස්කර ගතයුතු බවත්, එය ඉල්ලා අස්කර නොගෙන හිමින් සීරුවේ සම්මත කර ගැනීමට උත්සාහ දරන බවත් උන්වහන්සේ චෝදනා කළහ.
උන්වහන්සේ වැඩිදුරටත් සඳහන් කළේ, අගමැතිවරිය අපේකම, අපේ ශිෂ්ටත්වය, අපේ සම්ප්රදාය ගණන් ගන්නේ නැති නම්, රටේ ජනතාව විශ්වාසය තබා ඇත්තේ ජනාධිපති අනුර කුමාර දිසානායක මහතා සම්බන්ධයෙන් පමණක් බවයි. එමෙන්ම, මහා නාහිමිපාණන් වහන්සේලා ද ජනාධිපතිවරයාට මෙහි යථාර්ථය පහදා දිය යුතු බව ද උන්වහන්සේ අවධාරණය කළහ.
