ලොස් ඇන්ජලීස් නගරයේ දින පහක් පුරා පැතිර ගිය විරෝධතා හමුවේ, නගරාධිපති කැරන් බාස් අඟහරුවාදා සවස හදිසි ප්රවෘත්ති සාකච්ඡාවක් කැඳවමින් නගරය පුරා ඇඳිරි නීතිය පැනවීමට නියෝග කළ අතර මෙම පියවර ගෙන ඇත්තේ නගරයේ සාමය ආරක්ෂා කර ගැනීම සඳහා අත්යවශ්ය උපාය මාර්ගයක් ලෙසයි. අඟහරුවාදා රාත්රී 8 ට පැසිෆික් වේලාවෙන් ආරම්භ වූ ඇඳිරි නීතිය, පසුදා පෙ.ව. 6 දක්වා ක්රියාත්මක වන අතර, එය දින කිහිපයක් පුරා පැවතිය හැකි බවට අපේක්ෂා කෙරේ. නගරාධිපති බාස් පැහැදිලිවම කියා සිටියේ, මෙම නියෝගය කඩ කරන ඕනෑම අයෙකු අත්අඩංගුවට ගැනීමට පොලිසියට බලය ඇති බවයි.
සිකුරාදා රාත්රියේ සිට ලොස් ඇන්ජලීස් නගරයේ විවිධ ප්රදේශවල විරෝධතා උත්සන්න වී තිබෙන අතර නගරාධිපතිවරයා සඳහන් කළේ, විරෝධතාකරුවන් දුසිම් ගණනක් එක්සත් ජනපද 101 අධිවේගී මාර්ගය හරහා යාමට උත්සාහ කළ බවත්, නගර මධ්යයේ ගොඩනැගිලිවලට ග්රැෆිටි ලියා තිබීම හා ජනේල කැඩී තිබීමෙන් “සැලකිය යුතු හානියක්” සිදුවී ඇති බවත් ය . L.A.P.D. ප්රධානී ජිම් මැක්ඩොනෙල්ට අනුව, මෙම සතිය පුරා දිනපතා අත්අඩංගුවට ගැනීම් සංඛ්යාව කැපී පෙනෙන ලෙස ඉහළ ගොස් තිබේ. සෙනසුරාදා 27ක්, ඉරිදා 40ක්, සඳුදා 114ක්. අඟහරුවාදා සවස් වන විට, විරෝධතා ආරම්භ වීමටත් පෙර 200 කට ආසන්න පිරිසක් රඳවාගෙන සිටියහ.
මෙම විරෝධතා පැන නැගීමට ප්රධාන හේතුව වී ඇත්තේ ට්රම්ප් පරිපාලනය විසින් සිදුකරන සංක්රමණික වැටලීම් බව කැලිෆෝනියාවේ දේශපාලන නායකයින් පවසයි. ආණ්ඩුකාර ගැවින් නිව්සම්ගේ විරෝධය නොතකා ජාතික ආරක්ෂක භටයින් සහ මැරීන් භටයින් කැලිෆෝනියාවට යැවීමට ට්රම්ප් ගත් තීරණය ද ක්රියාකාරීන්ගේ කෝපය තවදුරටත් අවුලුවා තිබේ. “සිදුවී ඇති විනාශකාරී ක්රියා සහ ප්රචණ්ඩත්වය අවම කිරීමක් නොවේ,” නගරාධිපති බාස් අවධාරණය කළේය. “නමුත් මෙය නගරය පුරා පැතිරුණු අර්බුදයක් නොවන බව ජනතාව දැන ගැනීම අතිශයින් වැදගත් ය .” විරෝධතා හා ප්රචණ්ඩත්වයේ ඇතැම් දර්ශන නිසා සමස්ත නගරයම අර්බුදයක පවතින බවක් පෙනුනත්, සත්යය එය නොවන බව ඇය පැහැදිලි කළේය.
2020 දී ජෝර්ජ් ෆ්ලොයිඩ් ඝාතනයෙන් පසු රට පුරා පැතිර ගිය විරෝධතා සමයේදී ද ලොස් ඇන්ජලීස්හි ඇඳිරි නීතිය පැනවූ අතර, එවකට සාමකාමී විරෝධතාකරුවන් එම නියෝග නොතකා පෙළපාලි පැවැත්වූ අත්දැකීම් ද නගරයට තිබේ. එමෙන්ම, කොවිඩ්-19 වසංගතය හා ලැව්ගිනි තත්ත්වයන් වලදී ද මෙවැනි සීමා පැනවීමට සිදු වී ඇති අතර, ජාතික ආරක්ෂක භටයින් යොදවා ඇති අවසාන අවස්ථාව එයයි.
