අලුත් පාස්පෝට් එකේ ඉංග්‍රීසි වැරදිලු !

අලුතින් නිකුත් කරන ලද විදේශ ගමන් බලපත්‍ර පිළිබඳව සමගි ජනබලවේගයේ පාර්ලිමේන්තු මන්ත්‍රී මුජිබර් රහ්මාන් සිය කණස්සල්ල පළකර තිබේ.

ඔහු චෝදනා කරන්නේ, මින් පෙර නිකුත් කළ විදේශ ගමන් බලපත්‍රයට සාපේක්ෂව අළුතින් නිකුත් කරන ගමන් බලපත්‍රයේ ඉංග්‍රීසි අක්ෂර වින්‍යාස දෝෂ පවතින අතර, එහි ආරක්ෂක මුහුණුවර ද දුර්වල බවයි.

“අපි විදේශ රටක සිටින විට අපව විනිශ්චය කරනු ලබන්නේ විදේශ ගමන් බලපත්‍රය මගින්. විදේශ ගමන් බලපත්‍රයේ පිටු අංක 30 බලන්න. යාපහුව වෙනුවට එහි සඳහන් වන්නේ වෙනත් දෙයක්. 31 වන පිටුවේ තලෙයිමන්නාරම වෙනුවට වෙන දෙයක් කියනවා. ඉංග්‍රීසි අක්ෂර වින්‍යාසය වැරදියි! මොනතරම් අපහසුතාවයක්ද? ”

මන්ත්‍රීවරයා පැවසුවේ මෙම දෝෂ හේතුවෙන් රජය අපහසුතාවට සහ ලජ්ජාවට පත්වන බවයි.

එමෙන්ම නව විදේශ ගමන් බලපත්‍රයේ ප්‍රධාන ආරක්ෂක අංග ඉවත් කර තිබීම ද ඔහු විවේචනය කළේය.

“පැරණි විදේශ ගමන් බලපත්‍රයේ පළමු පිටුවේ තිබුණේ පාරජම්බුල තාක්ෂණය භාවිතයෙන් තහවුරු කළ හැකි විදේශ ගමන් බලපත්‍ර අංකයයි. පාරජම්බුල කිරණ යටතේ, එය රතු පැහැයට හැරුණු අතර, ආරක්ෂක මුහුණුවරක් ලෙස ක්‍රියා කරනවා. නව විදේශ ගමන් බලපත්‍රයේ මෙය නැහැ. ඒ වෙනුවට වෙනස් කළ හැකි පුද්ගලීකරණය කළ දත්ත පිටුව පමණක් ඇතුළත් වෙලා තිබෙනවා. මෙය නව නිල් ගමන් බලපත්‍රයේ ආරක්ෂාවට බාධාවක්. මෙය සිදුවුණේ කොහොමද? ” ඔහු ප්‍රශ්න කළේය.

මේ සම්බන්ධයෙන් අධිකරණයට කරුණු ඉදිරිපත් කළහොත්, විදේශ ගමන් බලපත්‍ර ආපසු කැඳවා නැවත නිකුත් කිරීමට රජයට සිදුවිය හැකි බවට ද මන්ත්‍රීවරයා අනතුරු ඇඟවීය.

“මෙවැනි අඩු ගුණාත්මක විදේශ ගමන් බලපත්‍රයක් සඳහා ජනතාව රුපියල් 20,000 මුදලක් ගෙවනවා,” යනුවෙන් මන්ත්‍රීවරයා චෝදනා කළේය.