Island Voice LK

අද පෙරවරුවේ සිට GMOA අඛණ්ඩ වෘත්තීය ක්‍රියාමාර්ගයක

රජයේ වෛද්‍ය නිලධාරීන්ගේ සංගමය (GMOA) අද (26) පෙරවරු 8.00 සිට දිවයින පුරා අඛණ්ඩ වෘත්තීය සමිති ක්‍රියාමාර්ගයක් ආරම්භ කර තිබේ. රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ මහතා සඳහන් කළේ ක්‍රමවේද පහක් ඔස්සේ මෙම විරෝධතාව ක්‍රියාත්මක වන බවයි.

මෙම වෘත්තීය සමිති ක්‍රියාමාර්ගය යටතේ රෝහල් පද්ධතිය තුළ නොමැති ඖෂධ හෝ රසායනාගාර පරීක්ෂණ බාහිර පෞද්ගලික අංශයෙන් ලබා ගැනීම සඳහා වෛද්‍යවරුන් විසින් නිර්දේශ නිකුත් කරනු නොලැබේ. එමෙන්ම රෝහල් ඒකකයක් සඳහා අවශ්‍ය නිසි වෛද්‍යවරුන් සංඛ්‍යාව අනුමත කර නොමැති අවස්ථාවන්හිදී නව ඒකක ආරම්භ කිරීමට සහාය නොදැක්වීමටත්, දේශපාලන අවශ්‍යතා මත පවත්වන වෛද්‍ය සායන සහ කඳවුරු වර්ජනය කිරීමටත් වෛද්‍යවරුන් තීරණය කර ඇත. මීට අමතරව, ප්‍රතිකාර කටයුතුවලදී සහායක නිලධාරියෙකු ලබා නොදෙන ස්ථානවල රාජකාරිවලින් ඉවත් වීමටද ඔවුන් පියවර ගෙන තිබේ.

මේ පිළිබඳව අදහස් දක්වමින් එම සංගමයේ ලේකම් වෛද්‍ය ප්‍රභාත් සුගතදාස මහතා අවධාරණය කළේ මෙය සේවයෙන් ඉවත් වීමක් නොව, නිසි පහසුකම් පවතින වටපිටාවක පමණක් රාජකාරි කිරීමක් බවයි. සෞඛ්‍ය සේවය පවත්වාගෙන යාමට අවශ්‍ය පහසුකම් සැපයීම බලධාරීන්ගේ වගකීමක් බවත්, මෙම තත්ත්වය මත සෞඛ්‍ය සේවාව බිඳ වැටුණහොත් එහි සම්පූර්ණ වගකීම රජය සහ සෞඛ්‍ය අමාත්‍යාංශය භාරගත යුතු බවත් ඔහු පවසා සිටියේය.

එළඹෙන ජනවාරි 28 වන බදාදා පැවැත්වීමට නියමිත මධ්‍යම කාරක සභා රැස්වීමේදී මීටත් වඩා දැඩි වෘත්තීය සමිති ක්‍රියාමාර්ගවලට එළඹීම පිළිබඳව අවසන් තීරණයක් ගන්නා බවද වෛද්‍ය ප්‍රභාත් සුගතදාස මහතා වැඩිදුරටත් ප්‍රකාශ කළේය.