පැරිසියේ පිහිටි ලොව වඩාත්ම ප්රසිද්ධ කෞතුකාගාරයක් වන ලූවර් කෞතුකාගාරය (Louvre Museum) අද (19) උදෑසන සිදුවූ සොරකමක් හේතුවෙන් තාවකාලිකව වසා දමා ඇත. ප්රංශ සංස්කෘතික අමාත්යාංශය මෙම සොරකම තහවුරු කළේය.
වසර 200කට වඩා පැරණි මෙම කෞතුකාගාරය විවෘත කිරීමට ආසන්නව තිබියදී සිද්ධිය වාර්තා වී ඇති අතර, සොරකම් කරන ලද වස්තූන් පිළිබඳ නිශ්චිත තොරතුරු තවමත් නිකුත් කර නොමැත.
1793 වසරේදී මහජනතාව සඳහා විවෘත කරන ලද ලූවර් කෞතුකාගාරය, ලියනාඩෝ ඩා වින්චිගේ සුප්රකට ‘මොනාලිසා’ සිතුවම ඇතුළු අතිශය වටිනා පුරාවස්තු රැසකට නිවහනකි. මොනාලිසා සිතුවම 1797 සිට මෙහි ප්රදර්ශනය කෙරෙන ප්රංශ ජනරජයට අයත් දේපළකි.
පසුගිය වසරේදී මිලියන 8.7ක පිරිසක් පැමිණි ලොව වැඩිම පිරිසක් නරඹන මෙම කෞතුකාගාරයේ සිදුවූ සොරකම සම්බන්ධයෙන් මේ වනවිට විමර්ශන කටයුතු ක්රියාත්මක වේ.
