දූෂණ චෝදනාවක් සම්බන්ධයෙන් අල්ලස් කොමිසම මගින් අත්අඩංගුවට ගෙන රක්ෂිත බන්ධනාගාර ගත කර සිටි හිටපු රාජ්ය අමාත්ය ශෂීන්ද්ර රාජපක්ෂ මහතා ඔක්තෝබර් මස 14 වන දා දක්වා තවදුරටත් රක්ෂිත බන්ධනාගාර ගත කරන ලෙස කොළඹ මහේස්ත්රාත් අධිකරණය අද (30) නියම කළේය.
අල්ලස් කොමිසමේ නිලධාරීන් සහ සැකකරුගේ නීතිඥවරුන් ඉදිරිපත් කළ කරුණු සලකා බැලීමෙන් අනතුරුව කොළඹ ප්රධාන මහේස්ත්රාත් අසංක එස්. බෝදරගම මහතා මෙම නියෝගය නිකුත් කළේය.
මීළඟ නඩු දිනයේදී සැකකරුට බන්ධනාගාර රෝහලේදී සහ වෙනත් රෝහල්වලදී ලබා දුන් ප්රතිකාර පිළිබඳ පූර්ණ වාර්තාවක් අධිකරණයට ඉදිරිපත් කරන ලෙසට ද මහේස්ත්රාත්වරයා බන්ධනාගාර අධිකාරිවරයාට නියම කළේය.
ශෂීන්ද්ර රාජපක්ෂ මහතා අත්අඩංගුවට ගෙන ඇත්තේ පහත සඳහන් චෝදනා සම්බන්ධයෙනි:
ශ්රී ලංකා මහවැලි අධිකාරියට අයත් සෙවණගල, කිරිඉබ්බන්වැව ප්රදේශයේ පිහිටි ඉඩමක අනවසරයෙන් ඉදිකර තිබූ ගොඩනැගිල්ලක් ඇතුළු දේපළ, 2022 මැයි 09 වැනිදා ඇති වූ අරගලයේදී හානියට පත් විය.
එම දේපළ සඳහා වන්දි ගෙවීම ප්රතික්ෂේප කර තිබියදී, ඊට පටහැනිව හානිපූර්ණය සඳහා වන කාර්යාලයට අනුයුක්තව කටයුතු කළ ඇතැම් රජයේ නිලධාරීන්ට නිල බලය යොදා බලපෑම් කර තිබේ.
ඒ අනුව රුපියල් 8,850,000/- ක් වන්දි ලබා ගැනීම තුළින් “දූෂණය” නමැති වරද සිදුකිරීම සහ මහවැලි අධිකාරිය සතු දේපළක් සාපරාධී සාවද්ය පරිහරණය තුළින් පොදු දේපළ පනත යටතේ වරදක් සිදු කළේ යැයි ඔහුට චෝදනා එල්ල වේ.
