මහ වැසි අඩු වන ලකුණූ?

අද(21) දිනයෙන් පසුව පැවැති අධික වැසි තත්ත්වය පහව යන බව කාලගුණ විද්‍යා දෙපාර්තමේන්තුව පවසයි.
එහෙත් දින කිහිපයක් වැසි සහිත තත්ත්වය තවදුරටත් පැවතිය හැකි බව අධ්‍යක්ෂ ජනරාල් අතුල කරුණානායක මහතා සඳහන් කළේය.

මේ අතර අධික වැසි සමග අම්පාර දිස්ත්‍රික්කයට එල්ල වී ඇති බලපෑම ඉදිරි දිනවල දී වැසි නොලැබුණහොත් පහව යනු ඇතැයි දිස්ත්‍රික් ලේකම් චින්තක අබේවික්‍රම මහතා පැවසීය.

ඔහු සඳහන් කළේ, සේනානායක සමුද්‍රයේ වාන්දොරටු 05 ම විවෘත කර ඇති බවත් ඉහළ ධාරා ප්‍රදේශවලින් තවදුරටත් ඉහළ ධාරිතාවයකින් සේනානායක සමුද්‍රය වෙත ජලය ලැබෙමින් ඇතැයි, ලේකම්වරයා පෙන්වා දෙයි.

ඉගිනියාගල සේනානායක සමුද්‍රයේ වාන් දොරටු විවෘත කිරීමත් සමග ගල් ඔයේ ඉවුරු කඩාගෙන යාමෙන් ප්‍රදේශ කිහිපයක ගොවිබිම් ජලයෙන් යටවි තිබෙන අතර සමන්තුරේ නේනකාඩු ප්‍රදේශයෙන් ගල් ඔයේ ඉවුරු කඩාගෙන ගොස් ඇති බවයි.

මල්වතු ඔය තවදුරටත් පවතින්නේ මහ ගංවතුර මට්ටමේ බවත් යාං ඔය සහ කලා ඔය ගංවතුර මට්ටමේ පවතින බව වාරිමාර්ග දෙපාර්තමේන්තුව පැවසීය.
බලපෑමට ලක්ව ඇති දිස්ත්‍රික්ක ගණන 15 ක් වන ආපදාවලින් මියගිය ගණන 02ක් දක්වා ඉහළ ගොස් ඇති අතර තුවාල ලැබූ සංඛ්‍යාව 03 කි. එසේම පවුල් 6785ක පුද්ගලයින් 20300 දෙනෙකු තවදුරටත් පීඩාවට පත්ව ඇති බවයි.

ආපදා කළමනාකරණ මධ්‍යස්ථානය පැවසුවේ සුරක්ෂිතතා මධ්‍යස්ථාන 22 රඳවා සිටින පුද්ගලයින් ගණන 1165ක් බවයි.

බදුල්ල, මහනුවර, කුරුණෑගල, මාතලේ දිස්ත්‍රික්ක සඳහා පැන වූ නායයෑම් අනතුරු ඇඟවීම් තවදුරටත් බලාත්මක බව ජාතික ගොඩනැගිලි පර්යේෂණ ආයතනය පැවසුවේය.