ජනතා විමුක්ති පෙරමුණේ (JVP) නිර්මාතෘ රෝහණ විජේවීරගේ අභාවයෙන් පසු ඔහුගේ බිරිඳ සහ දරුවන් ආරක්ෂා කිරීම සහ නඩත්තු කිරීම වෙනුවෙන් රජය විසින් මෙතෙක් රුපියල් දෙකෝටි හැටහය ලක්ෂයකට අධික මුදලක් (රු. 26,278,052.39) වැය කර ඇති බව රාජ්ය ආරක්ෂක අමාත්යාංශය පාර්ලිමේන්තුවේදී අනාවරණය කර සිටියි.
පාර්ලිමේන්තු මන්ත්රී අජිත් පී. පෙරේරා විසින් යොමු කරන ලද ප්රශ්නයකට පිළිතුරු දෙමින් ආරක්ෂක අමාත්යාංශයේ ලේකම්, එයාර් වයිස් මාෂල් සම්පත් තුයියකොන්තා (විශ්රාමික)ගේ අත්සනින් නිකුත් කර ඇති අදාළ නිල ලේඛනයට අනුව මේ පිළිබඳ තොරතුරු රැසක් හෙළි වී තිබේ.
1989 නොවැම්බර් 13 වන දින සිදු වූ රෝහණ විජේවීර මහතාගේ මරණයෙන් පසු, ඔහුගේ බිරිඳ වන ශ්රීමති චිත්රාංගනී ප්රනාන්දු මහත්මිය ඇතුළු දරුවන් හයදෙනා (දසුන් ඊගා, සුපුන් මාගා, මායා විභූති, අමා සසිරි යන දියණියන් සහ උවිඳු විදුර, සුපුන් අදිශ යන පුතුන්) රජයේ නඩත්තුව හා ආරක්ෂාව යටතට ගෙන ඇත.
එම පවුලේ සාමාජිකයන්:
- 1992 ජූනි 11 සිට 1999 අගෝස්තු 22 දක්වා – ත්රිකුණාමලය නාවික තටාකාංගනය තුළද,
- 1999 අගෝස්තු 23 සිට මේ දක්වා – වැලිසර නාවික සංකීර්ණයේ පිහිටි ශ්රී ලංකා නාවික නෞකා ගැමුණු ආයතනය තුළද
රඳවාගෙන ආරක්ෂාව සපයා ඇත.
අදාළ ලේඛනයට අනුව, වර්තමානය වන විටත් රජයේ ආරක්ෂාව සහ නඩත්තුව ලබන්නේ විජේවීර මහතාගේ බිරිඳ වන ශ්රීමති චිත්රාංගනී ප්රනාන්දු මහත්මිය සහ විශේෂ අවශ්යතා සහිත තෙවන දියණිය වන මායා විභූති විජේවීර මහත්මිය පමණි.
ඔවුන් දෙදෙනාගේ ආරක්ෂාව සහ නඩත්තුව වෙනුවෙන් වර්තමානයේ රජය විසින් මසකට රුපියල් 153,220.25 ක මුදලක් වැය කරනු ලබයි.
