මෙවර අධ්යයන පොදු සහතික පත්ර උසස් පෙළ විභාගය කල් දැමීමක් සිදුකරන බවට සමාජ ජාලා ඔස්සේ පළවන අසත්ය ප්රචාරවලට හසු නොවන ලෙසත්, විභාගය කල් දැමීමක් ගැන බියක් ඇති කර නොගන්නා ලෙසත් විභාග කොමසාරිස් ජනරාල් අමිත් ජයසුන්දර මහතා විභාග අපේක්ෂකයන්ගෙන් ඉල්ලීමක් කරයි.
සමාජ ජාලා ඔස්සේ පළවන වැරැදි ප්රචාර හේතුවෙන් අයැදුම්කරුවන් විභාගය පිළිබඳව අවිනිශ්චිතභාවයකින් සිටින බව පැවැසූ කොමසාරිස්වරයා උසස් පෙළ විභාගය පිළිබඳව ශ්රී ලංකා විභාග දෙපාර්තමේන්තුව ලබා දෙන නිල නිවේදන හැර සමාජ ජාලාවල පළවන අසත්ය පුවත් නොපිළිගන්නා ලෙස ද සඳහන් කළේ ය.
විභාග දෙපාර්තමේන්තුවේ වෙබ් අඩවියේ පළවන විභාග කාලසටහනට පමණක් අවධානය යොමුකරන ලෙසත්, වෙනත් වැරැදි කාලසටහන් පරිශීලනය නොකරන ලෙසත් හෙතෙම ප්රකාශ කළේ ය.
ශ්රී ලංකා විභාග දෙපාර්තමේන්තුවේ පැවති මාධ්ය හමුවකදී අමිත් ජයසුන්දර මහතා මේ බව කීය.
2024 උසස් පෙළ විභාගය නොවැම්බර් 25දා සිට දෙසැම්බර් 20දා දක්වා පැවැත්වෙන බව ද කොමසාරිස්වරයා පැවසීය.
දිවයින පුරා විභාග මධ්යස්ථාන 2,317කදී දින 22ක් පැවැත්වෙන මෙවර විභාගයේ විෂයන් 64කට පාසල් අපේක්ෂකයන් 253,390ක් සහ පෞද්ගලික අයැදුම්කරුවන් 79,795ක් ඇතුළුව සිසුන් 333,185ක් අයැදුම්කර තිබෙන බව ද හෙතෙම සඳහන් කළේ ය.
මේ අතර, මහ මැතිවරණය හේතුවෙන් උසස් පෙළ විභාගයේ දින වකවානු වෙනස් නොවන බව ත් මැතිවරණ කොමිෂන් සභාව සමග මේ පිළිබඳව සාකච්ඡා කළ බව ත් ජයසුන්දර මහතා ප්රකාශ කළේ ය.
විභාගයට බාධාවක් නොවන ලෙසට මැතිවරණ කටයුතු සිදුකරන ලෙසට මැතිවරණ නිලධාරීන්ට තමා උපදෙස් ලබා දී ඇතැයි කී කොමසාරිස්වරයා විභාගයේ ආරක්ෂාව සම්බන්ධයෙන් පොලිස් දෙපාර්තමේන්තුව සමග සාකච්ඡා කළ බව ද පැවසීය.
