ජාතික නිවාස සංවර්ධන අධිකාරියේ ඉහළ කළමනාකාරීත්වයට දේශපාලන බලපෑම්

ජාතික නිවාස සංවර්ධන අධිකාරියේ ඉහළ කළමනාකාරීත්වය ඉලක්ක කර ගනිමින් මේ වන විට දැඩි දේශපාලන බලපෑම් එල්ල වෙමින් පවතින බව අභ්‍යන්තර ආරංචි මාර්ගවලින් වාර්තා වෙයි. එහි ආසන්නතම පියවරක් ලෙස, අධිකාරියේ වත්මන් සභාපති අරවින්ද සිරිනාථ මහතාගේ අවශ්‍යතාවය පරිදි, වසර පහළොවක පමණ කාලයක් එහි මානව සම්පත් නියෝජ්‍ය සාමාන්‍යාධිකාරීවරයා ලෙස කටයුතු කළ ලලිත් එදිරිසිංහ මහතාගේ වැඩ තහනම් කිරීමට පියවර ගෙන ඇත. මීට පෙර වැඩ බලන සාමාන්‍යාධිකාරීවරයා ලෙස ද සේවය කර ඇති ප්‍රධාන පෙළේ ජ්‍යෙෂ්ඨ නිලධාරියකු වන ඒ මහතාගේ වැඩ තහනම් කර ඇත්තේ කිසිදු මූලික පරීක්ෂණයකින් පවා තොරව වීම විශේෂත්වයකි.

මෙම අත්තනෝමතික ක්‍රියාකලාපයට එරෙහිව ශ්‍රී ලංකා මානව හිමිකම් කොමිෂන් සභාව වෙත මේ වන විටත් නිල වශයෙන් පැමිණිල්ලක් ඉදිරිපත් කර තිබුණ ද, ඊට අදාළ විභාගයන් සඳහා පෙනී සිටීම වත්මන් සභාපතිවරයා දිගින් දිගටම මගහරිමින් සිටින බව ද දැනගන්නට ඇත.

මේ අතර, අධිකාරිය තුළ පවතින මෙම දැඩි දේශපාලන ඇඟිලි ගැසීම් සහ බලපෑම් හේතුවෙන් එහි අධ්‍යක්ෂ මණ්ඩලය ද දැඩි අස්ථාවරත්වයකට පත්ව තිබේ. එහි එක් පියවරක් ලෙස, අධිකාරියේ නිල බලයෙන් අධ්‍යක්ෂ මණ්ඩලය නියෝජනය කළ අදාළ අමාත්‍යාංශයේ අතිරේක ලේකම්වරයා එම ධුරයෙන් ඉවත් කර ඇති අතර, එල්ල වන විවිධ බලපෑම් දරාගත නොහැකිව මුදල් අමාත්‍යාංශය නියෝජනය කළ නියෝජිතයා ද සිය කැමැත්තෙන්ම අධ්‍යක්ෂ මණ්ඩලයෙන් ඉවත් වී ඇත.

පාලනාධිකාරියේ මෙවැනි දැඩි ව්‍යාකූල සහ මතභේදාත්මක පසුබිමක, ලබන බදාදා දිනයේදී ජාතික නිවාස සංවර්ධන අධිකාරිය පාර්ලිමේන්තුවේ පොදු ව්‍යාපාර පිළිබඳ කාරක සභාව (COPE) හමුවට කැඳවා තිබීම හේතුවෙන් මෙම තත්ත්වය වඩාත් උණුසුම් මුහුණුවරක් ගෙන තිබේ.