වෙනිසියුලාව යුධ පිටියක් වෙයි: ඇමෙරිකානු ප්‍රහාරවලින් 40ක් මරුට

වෙනිසියුලාව තුළ ඇමෙරිකානු හමුදා ක්‍රියාත්මක කළ දරුණු ප්‍රහාර මාලාවකින් එරට හමුදා භටයින් සහ සිවිල් වැසියන් ඇතුළු අවම වශයෙන් පුද්ගලයින් 40 දෙනෙකු පමණ මියගොස් ඇති බව විදෙස් මාධ්‍ය වාර්තා කරයි. වෙනිසියුලානු ජ්‍යෙෂ්ඨ නිලධාරියෙකු උපුටා දක්වමින් පළ වන මෙම වාර්තා මඟින් එරට පවතින අතිශය අර්බුදකාරී සහ බියකරු වාතාවරණය තහවුරු කෙරේ. ඇමෙරිකානු මෙහෙයුම් හමුවේ වෙනිසියුලාවේ ආරක්ෂක අංශ සහ සාමාන්‍ය වැසියන් මෙලෙස ජීවිතක්ෂයට පත්වීම ජාත්‍යන්තර අවධානයට ලක්ව තිබේ.

වෙනිසියුලාව තුළ සිදුවන මෙම ඇමෙරිකානු හමුදා මැදිහත්වීම සහ එරට අනාගතය පිළිබඳව තීරණාත්මක සාකච්ඡාවක් පැවැත්වීම සඳහා එක්සත් ජාතීන්ගේ ආරක්ෂක මණ්ඩලය හෙට (05) හදිසි රැස්වීමක් කැඳවා ඇත. නිව්යෝර්ක් හි පිහිටි එක්සත් ජාතීන්ගේ මූලස්ථානයේදී පැවැත්වෙන මෙම රැස්වීම සඳහා ආරක්ෂක මණ්ඩලය නියෝජනය කරන රටවල් 15ක තානාපතිවරුන් සහභාගී වීමට නියමිතය. වෙනිසියුලානු ජනාධිපති නිකොලොස් මධුරෝ සහ ඔහුගේ බිරිඳ ඇමෙරිකානු භාරයට ගැනීමෙන් පසු උද්ගතව ඇති තත්ත්වය මෙහිදී ප්‍රධාන වශයෙන් සාකච්ඡා වනු ඇත.

මේ අතර, ඇමෙරිකානු අත්අඩංගුවට පත් වෙනිසියුලානු ජනාධිපති නිකලොස් මදුරෝ සහ ඔහුගේ බිරිඳ නිව්යෝර්ක් නුවර බෘක්ලින්හි පිහිටි මෙට්‍රොපොලිටන් රැඳවුම් මධ්‍යස්ථානය වෙත ප්‍රවාහනය කර ඇති බව වාර්තා වේ. දේශපාලන නායකයෙකු මෙලෙස රැඳවුම් මධ්‍යස්ථානයකට යොමු කිරීමත් සමඟ වෙනිසියුලානු රජයේ හිතවාදීන් සහ ඇමෙරිකාව අතර පවතින රාජ්‍ය තාන්ත්‍රික ගැටුම තවදුරටත් උත්සන්න වී තිබේ. හෙට පැවැත්වෙන ආරක්ෂක මණ්ඩල රැස්වීම වෙනිසියුලාවේ ඉදිරි දේශපාලන ගමන්මග තීරණය කරන තීරණාත්මක සන්ධිස්ථානයක් වනු ඇතැයි අපේක්ෂා කෙරේ.