ශීත ඍතුව වෙනුවෙන් පෝලන්තයේ සිට ශ්රී ලංකාවට පැමිණෙන සංචාරකයන් රැගත් ප්රථම ගුවන් යානය ඊයේ (23) රාත්රියේ කටුනායක බණ්ඩාරනායක ජාත්යන්තර ගුවන්තොටුපොළ වෙත ළඟා විය. ස්මාර්ට් වින්ග්ස් ගුවන් සේවයට අයත් මෙම විශේෂ ගුවන් යානය පෝලන්තයේ වෝර්සෝ නුවර සිට පැමිණි අතර, එය මෙරට සංචාරක ක්ෂේත්රයට නව බලාපොරොත්තුවක් එක් කරමින් රාත්රී 10.10 ට පමණ ගුවන්තොටුපොළ වෙත ස්පර්ශ කරන ලදී.
බෝයිං 737 වර්ගයට අයත් මෙම ගුවන් යානයෙන් සංචාරකයන් 180 දෙනෙකු සහ කාර්ය මණ්ඩලයේ 09 දෙනෙකු මෙරටට පැමිණියහ. ශ්රී ලංකා සංචාරක ප්රවර්ධන කාර්යාංශයේ සහ ජෙට් වින්ග් සංචාරක සමාගමේ නිලධාරීන් විසින් මෙම පෝලන්ත සංචාරකයන් පිරිස ගුවන්තොටුපොළ පරිශ්රය තුළදී ඉතා උත්කර්ෂවත් අන්දමින් පිළිගැනීමට කටයුතු කර තිබුණි.
මෙම ගුවන් සේවය මගින් සතියකට එක් වරක්, එනම් සෑම අඟහරුවාදා දිනකම පෝලන්තයේ සිට සෘජු ගුවන් ගමන් ක්රියාත්මක කිරීමට සැලසුම් කර ඇත. මෙම විශේෂ වැඩපිළිවෙළ එළැඹෙන 2026 වසරේ මාර්තු මස 15 දින තෙක් අඛණ්ඩව ක්රියාත්මක වන අතර, එමඟින් යුරෝපීය සංචාරකයන් විශාල පිරිසක් මෙරටට ආකර්ෂණය කර ගැනීමට අපේක්ෂා කෙරේ.
පැමිණි සංචාරකයන් දිවයිනේ ප්රකට සංචාරක ගමනාන්ත වන සීගිරිය, දඹුල්ල, මහනුවර, නුවරඑළිය සහ යාල වැනි ප්රදේශවල මෙන්ම වෙරළ තීරයන් ආශ්රිතව ද සිය නිවාඩුව ගත කිරීමට නියමිතය. මෙම නව ගුවන් සේවය ආරම්භ වීමත් සමඟ මෙරට විදේශ විනිමය ආදායම ඉහළ නැංවීමට සහ සංචාරක ක්ෂේත්රයේ ප්රබෝධයක් ඇති කිරීමට මනා පිටුවහලක් ලැබෙනු ඇත.
