උදාවූ 2026 නව වසර වෙනුවෙන් සුබ පැතුම් එක්කරමින් අග්රාමාත්ය හරිනි අමරසූරිය මහත්මිය ප්රකාශ කර සිටින්නේ, ගෙවුණු වසරේ මුහුණදුන් සියලු අභියෝගයන් ශක්තියක් බවට පත් කරගනිමින් නව ජවයකින් සහ අපේක්ෂාවෙන් යුතුව අනාගතය වෙත පියවර තැබිය යුතු බවයි. නව වසරේ ආරම්භයත් සමඟ ජනතාව වෙත පණිවුඩයක් නිකුත් කරමින් ඇය මේ බව සඳහන් කළාය.
ගෙවී ගිය 2025 වසර පිළිබඳව පසුවිපරමක් කිරීම කාලෝචිත බව පෙන්වා දෙන අග්රාමාත්යවරිය, පසුගිය වසර තුළ මෙරට නව දේශපාලන සංස්කෘතියක් ගොඩනැගීමට පදනම වැටුණු බව අවධාරණය කරයි. විශේෂයෙන්ම රාජ්ය පාලනයේ විනිවිදභාවය තහවුරු කිරීමටත්, දූෂණයෙන් තොර කාර්යක්ෂම රාජ්ය සේවාවක් ස්ථාපිත කිරීමටත් රජය ගත් උත්සාහයන් සාර්ථක වූ බව ඇය සිය පණිවුඩය මඟින් පෙන්වා දෙයි.
පසුගිය වසරේ ඇති වූ විවිධ ව්යසන තත්ත්වයන් හේතුවෙන් ජන ජීවිතයට එල්ල වූ බලපෑම් පිළිබඳව ද අග්රාමාත්යවරිය මෙහිදී සිහිපත් කළාය. එම අභියෝග හමුවේ බිඳවැටුණු ජන ජීවිත යළි යථා තත්ත්වයට පත් කිරීමේ සහ ව්යසනයෙන් පීඩාවට පත් වූවන්ගේ සිත් සුවපත් කිරීමේ දැඩි කැපවීම පෙරදැරිව 2026 වසරේ කටයුතු කළ යුතු බව ඇය වැඩිදුරටත් සඳහන් කරයි.
රටක් ලෙස පොදු අරමුණු ජය ගැනීම සඳහා සියලු දෙනා එක්ව කටයුතු කිරීමේ වැදගත්කම පෙන්වා දෙන අග්රාමාත්යවරිය, උදාවූ නව වසර සියලු ශ්රී ලාංකිකයන්ට සාමය, සතුට සහ සෞභාග්යය සපිරි වසරක් වේවායි ප්රාර්ථනා කර සිටියි.
