උඩරට දුම්රිය ධාවනය අති දුෂ්කර බව ඉංජිනේරුවන් කියති

දිට්වා සුළි කුණාටුව හේතුවෙන් ඇති වූ දැඩි වර්ෂාවත් සමඟ උඩරට දුම්රිය මාර්ගයේ ස්ථාන කිහිපයකම විශාල වශයෙන් නායයෑම් සිදු වී තිබේ. මේ හේතුවෙන් කොටගල සිට අඹේවෙළ දක්වා වූ දුම්රිය මාර්ගය යථා තත්ත්වයට පත් කිරීම අතිශය දුෂ්කර කාර්යයක් බව දුම්රිය මාර්ග නඩත්තු අංශයේ ඉංජිනේරුවරුන් අනාවරණය කර සිටියි.

ප්‍රතිසංස්කරණ කටයුතුවල නිරතව සිටින නානුඔය සහ හැටන් දුම්රිය ස්ථානවල නඩත්තු ඉංජිනේරුවන් පවසන්නේ කොටගල, ග්‍රේට් වෙස්ටන්, නානුඔය, පැරකුම්පුර සහ අඹේවෙළ යන දුම්රිය ස්ථාන ආසන්නයේ පිහිටි අධික බෑවුම් සහිත ප්‍රදේශවල දුම්රිය මාර්ගයේ මීටර් 50 සිට 100 දක්වා වූ කොටස් සම්පූර්ණයෙන්ම නායගොස් ඇති බවයි. මෙම නායයෑම් සමඟ දුම්රිය පීලි සහ සිල්බරම් කොටවලට ද දැඩි හානි සිදු වී තිබේ.

විශේෂයෙන්ම ග්‍රේට් වෙස්ටන් කඳුවැටියට පහළින් පිහිටි දුම්රිය මාර්ගය නායගිය ස්ථානයේ පස් පිරවීමට හෝ මාර්ගය වෙනත් දිශාවකට කැපීමට නොහැකි භූගෝලීය තත්ත්වයක් පවතින බව ඉංජිනේරුවරු පෙන්වා දෙති. පවතින සංකීර්ණ තත්ත්වය මත කොටගල සිට නානුඔය දක්වා වූ කොටසේ දුම්රිය ගමනාගමනය යථා තත්ත්වයට පත් කිරීමට සැලකිය යුතු කාලයක් ගතවනු ඇතැයි ඔවුන් වැඩිදුරටත් සඳහන් කරයි.

මේ අතර, නාවලපිටියේ සිට කොටගල දක්වා වූ මාර්ග කොටස පිළිසකර කිරීමෙන් පසු ඉකුත් 16 වනදා සේවා දුම්රියක් කොටගල දක්වා ධාවනය කර ඇති අතර, බණ්ඩාරවෙළ සිට අඹේවෙළ දක්වා තවත් සේවා දුම්රියක් පසුගිය 15 වනදා ධාවනය කර ඇත. කෙසේ වෙතත්, මැද කොටසේ පවතින අවදානම් තත්ත්වය හේතුවෙන් සම්පූර්ණ උඩරට දුම්රිය ධාවනය තවදුරටත් සීමා වී පවතී.