අම්බුළුවාව කේබල් කාර් ව්යාපෘතියේ ඉදිකිරීම් කටයුතුවලට අනිසි ලෙස බලපෑම් කරමින් බාධා කිරීම හේතුවෙන්, උඩපළාත ප්රාදේශීය ලේකම් ආත්මා දිල්රුක්ෂි ජයරත්න මහත්මියට ඇගේ පෞද්ගලික මුදලින් රුපියල් ලක්ෂයක මුදලක් අදාළ ඉදිකිරීම් සමාගමට ගෙවන ලෙස අභියාචනාධිකරණය අද (නොවැම්බර් 07) නියෝග කළේය.
විදේශ ආයෝජන මත ඉදිකරන මෙම ව්යාපෘතියේ ඉදිකිරීම්වලට කිසිදු අයුරකින් මැදිහත් වී බාධා කිරීම් සිදු නොකරන ලෙස ද අභියාචනාධිකරණය ප්රාදේශීය ලේකම්වරියට නියෝග කර තිබේ.
විනිසුරුවරයා සිය තීන්දුව ප්රකාශයට පත් කරමින් සඳහන් කළේ, ව්යාපෘතිය සඳහා අදාළ සමාගම වගකිව යුතු ආයතනවල අනුමැතිය ලබාගෙන තිබියදී ප්රාදේශීය ලේකම්වරිය ඇගේ රාජකාරි සීමාව ඉක්මවා අනිසි ලෙස හා ද්වේෂසහගත ලෙස කේබල් කාර් ව්යාපෘතියේ ඉදිකිරීම්වලට බාධා කර ඇති බව අනාවරණය වන බවයි.
මෙවැනි කාරණාවලදී නිසි පරිදි කරුණු අධ්යයනය කර අදාළ පාර්ශ්වයන්ට උපදෙස් දීමට නීතිපති දෙපාර්තමේන්තු නිලධාරීන් කටයුතු කළ යුතු බවද විනිසුරුවරයා වැඩිදුරටත් අවධාරණය කළේය.
අම්බුළුවාව කේබල් කාර් ව්යාපෘතියේ ඉදිකිරීම් සමාගම වන ඇම්බර් ඇඩ්වෙන්චර් සමාගම විසින් උඩපළාත ප්රාදේශීය ලේකම්වරියට විරුද්ධව අභියාචනාධිකරණයේ පවරා තිබූ නඩුවක් විභාග කිරීමෙන් අනතුරුව මෙම තීන්දුව ලබා දී ඇත.
පැමිණිලිකාර සමාගම වෙනුවෙන් ජනාධිපති නීතිඥ අලි සබ්රි මහතා සමඟ නීතිඥ නාමික් නාෆාත් මහතා පෙනී සිටි අතර, උඩපළාත ප්රාදේශීය ලේකම් වෙනුවෙන් නීතිපති දෙපාර්තමේන්තුව අධිකරණය හමුවේ පෙනී සිටියේය.
