කොළඹ: සංවිධානාත්මක අපරාධ කල්ලි සාමාජිකයෙකු වන සංජීව කුමාර සමරරත්න හෙවත් “ගණේමුල්ල සංජීව” ඝාතනයේ ප්රධාන සැකකාරිය වන ඉෂාරා සෙව්වන්දි ඇතුළු සැකකරුවන් පස්දෙනා දිවයිනට රැගෙන ඒමේ ක්රියාවලියට සහාය වීම සඳහා පොලිස් විශේෂ කාර්ය බළකා (STF) නිලධාරීන් දෙදෙනෙකු නේපාලය බලා පිටත්ව ගොස් තිබේ.
මේ වන විටත් අපරාධ පරීක්ෂණ දෙපාර්තමේන්තුවේ නිලධාරීන් දෙදෙනෙකු අත්අඩංගුවට ගත් සැකකරුවන් සමග නේපාලයේ රැඳී සිටින අතර, ඔවුන්ගේ කටයුතුවලට සහාය වීම සඳහා මෙම නිලධාරීන් දෙදෙනා පිටත්ව ගොස් ඇත.
නේපාල ආරක්ෂක අංශ සමග සිදුකළ ඒකාබද්ධ මෙහෙයුමකදී, නේපාලයේ කත්මන්ඩු නුවර සිට කිලෝ මීටර් 18ක පමණ දුරින් පිහිටි නිවසක රැඳී සිටිය දී ඉෂාරා සෙව්වන්දි ඇතුළු සැකකරුවන් අත්අඩංගුවට ගනු ලැබීය.
ඉෂාරා සෙව්වන්දිට අමතරව අත්අඩංගුවට ගත් සෙසු සැකකරුවන් සිව්දෙනා අතර කාන්තාවක් ද වන අතර, ඇය ඉෂාරා සෙව්වන්දිගේ රුවට සමාන රුවකින් සමන්විත බව වාර්තා වේ. අත්අඩංගුවට ගත් පුද්ගලයින් අතර “කෙහෙල්බද්දර පද්මේ” නැමැති අපරාධ කල්ලි නායකයාගේ සමීපතමයෙකු ද සිටින බව වාර්තා වේ.
