ජනපති සහ IMF නියෝජිතයන්ගේ වැදගත් සාකච්ඡාවක්

ජනාධිපති අනුර කුමාර දිසානායක සහ ජාත්‍යන්තර මූල්‍ය අරමුදලේ (IMF) නියෝජිත පිරිසක් අතර වැදගත් සාකච්ඡාවක් අද (ඔක්තෝබර් 07) පෙරවරුවේ ජනාධිපති කාර්යාලයේදී පැවැත්විණි.

ජනාධිපති මාධ්‍ය අංශය පැවසුවේ, මෙම සාකච්ඡාව පැවැත්වුණේ ණය ප්‍රතිව්‍යුහගතකරණ ක්‍රියාවලියේ දී IMF හි 6 වැනි වාරිකය ලබා දීමට පෙර පැවැත්වෙන 5 වැනි සමාලෝචනයේ මධ්‍යම අදියර වෙනුවෙන් බවයි.

සාකච්ඡාවේදී අදහස් දැක්වූ ජනාධිපති අනුර කුමාර දිසානායක මහතා පෙන්වා දුන්නේ, ආර්ථික වශයෙන් බංකොලොත් වී තිබූ රට ඉන් මුදාගෙන සංවර්ධනය කරා රැගෙන යාම රජයේ ප්‍රධාන අරමුණ බවත්, ඒ සඳහා උපාය මාර්ගික වැඩපිළිවෙලක් රජය සතුව පවතින බවත්ය.

එම වැඩපිළිවෙල සාර්ථක කර ගැනීමේ ක්‍රියාවලියේදී ජාත්‍යන්තර මූල්‍ය අරමුදල ලබා දෙන සහාය ඉතා අගය කරන බව ජනාධිපතිවරයා සඳහන් කළේය.

ආර්ථික පුනර්ජීවනයක් අත්පත් කර දිය හැකි රටක් ලෙස ශ්‍රී ලංකාව සංවර්ධනය කිරීමට නම්, IMF ලබා දී ඇති ඉලක්ක ද අභිබවා යාමේ අවශ්‍යතාව රජය හඳුනාගෙන ඇති බවත්, ඒ සඳහා විධිමත් වැඩපිළිවෙලක් ඇති බවත් ජනාධිපතිවරයා පෙන්වා දුන්නේය.

ආර්ථික පුනර්ජීවනයක් අත්කර ගැනීමේ ඉලක්කය සපුරා ගැනීමට දේශීය හා විදේශීය ආයෝජකයින් තවදුරටත් කැඳවාගත යුතු බව අවධාරණය කළ ජනාධිපතිවරයා, ඒ වෙනුවෙන් ආයෝජනයට හිතකර පරිසරයක් රට තුළ නිර්මාණය කළ යුතුව ඇති බව ද පෙන්වා දුන්නේය.

බිඳවැටී තිබූ මෙරට ආර්ථිකය ගොඩගැනීමට රජය ගෙන ඇති පියවර පිළිබඳ IMF නියෝජිතයෝ සිය අගය පළ කළ අතර, ඉදිරියේදී අනුගමනය කළ යුතු ක්‍රියාමාර්ග පිළිබඳව ද දෙපාර්ශ්වය තවදුරටත් සාකච්ඡා කර තිබේ.

ශ්‍රී ලංකා රජය වෙනුවෙන් කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු, මුදල් අමාත්‍යංශයේ ලේකම් ආචාර්ය හර්ෂණ සූරියප්ප්පෙරුම, මහ බැංකු අධිපති ආචාර්ය නන්දලාල් වීරසිංහ ඇතුළු පිරිසක් සහභාගී වූහ. IMF වෙනුවෙන් එහි දූත මණ්ඩල ප්‍රධානී Evan Papageorgiou සහ මෙරට නිත්‍ය නියෝජිත Martha Woldemichael ඇතුළු පිරිසක් මෙම සාකච්ඡාවට එක්වූහ.