තමිල්නාඩු වෙට්රි කසාගම් (TVK) පක්ෂයේ නායක සහ ප්රකට සිනමා නළු විජේ, ශ්රී ලංකාවේ දෙමළ ප්රජාව මුහුණ දෙන ගැටලු විසඳීමට මැදිහත් වන බවට පොරොන්දු වී ඇත. ඉන්දීය මාධ්ය වාර්තාවලට අනුව, ඔහු දිවංගත දෙමළ ඊළාම් විමුක්ති කොටි (එල්.ටී.ටී.ඊ.) නායක වේලුපිල්ලේ ප්රභාකරන්ව අගය කරමින් පවසා ඇත්තේ ඔහු දෙමළ ජනතාවට ‘මවක් වැනි’ නායකයෙකු වූ බවයි.
තමිල්නාඩුවේ නාගපට්ටිනම් හි පැවති මැතිවරණ රැලියකදී මෙම අදහස් පළ කරමින් විජේ කියා සිටියේ, “ශ්රී ලංකාවේ හෝ ලෝකයේ වෙනත් ඕනෑම තැනක සිටින අපගේ ඥාතීන් වන ඊළාම් දෙමළ ජනතාව, මාතෘ සෙනෙහස පෙන්වූ නායකයෙකු අහිමි වීමෙන් පසු දුක් විඳිනවා. ඔවුන් වෙනුවෙන් හඬ නැගීම අපගේ යුතුකමයි.” යනුවෙනි.
ශ්රී ලංකාවේ දෙමළ ප්රජාවට සහාය දැක්වූ පළමු අවස්ථාව මෙය නොවේ. 2008 දී, ශ්රී ලංකාවේ දෙමළ සිවිල් වැසියන් ඝාතනය කිරීමට විරෝධය පළ කරමින් ඔහු චෙන්නායි හි උපවාසයකට ද එක් විය. කෙසේ වෙතත්, තම දෙමළ ජනතාවට සහයෝගය දැක්වීම ඉන්දියාවේ තහනම් සංවිධානයක් වන එල්.ටී.ටී.ඊ.යට අනුමැතිය දීමක් ලෙස වරදවා වටහා නොගත යුතු බවට ඔහු අවධාරණය කර ඇත.
1991 දී ඉන්දීය හිටපු අගමැති රජිව් ගාන්ධි ඝාතනය කිරීමට කුමන්ත්රණය කිරීම සම්බන්ධයෙන් ප්රභාකරන්ට සහ ඔහුගේ බුද්ධි අංශ ප්රධානී පොට්ටු අම්මාන්ට චෝදනා එල්ල විය. එම සිදුවීමෙන් පසු එල්.ටී.ටී.ඊ.ය ඉන්දියාවේ තහනම් සංවිධානයක් බවට පත් විය.
ප්රභාකරන් පිළිබඳ ඔහුගේ ප්රකාශයන්ට අමතරව, තමිල්නාඩුව සහ ශ්රී ලංකාව අතර දිගුකාලීනව පවතින ධීවර ගැටලුවට විසඳුම් ලබා දෙන බවට ද විජේ ප්රතිඥා දුන්නේය. ධීවර ගැටලුව සම්බන්ධයෙන් ඩී.එම්.කේ. රජය විවේචනය කරමින් ඔහු කියා සිටියේ, “මෙම ගැටලුවට විසඳුමක් සොයා ගැනීම අපගේ ප්රධාන න්යායපත්රවලින් එකකි.” යනුවෙනි.
