රමිත් රඹුක්වැල්ල අනීතිකව උපයාගත් වත්කම් ගැන හෙළි වේ !

හිටපු අමාත්‍ය කෙහෙලිය රඹුක්වැල්ල මහතාගේ පුත් රමිත් රඹුක්වැල්ලට එරෙහිව අල්ලස් හොරකම් විමර්ශන කොමිසම (CIABOC) මඟින් ඊයේ (12) කොළඹ මහාධිකරණය හමුවේ අධිචෝදනා ගොනු කර ඇත.

රමිත් රඹුක්වැල්ල 2022 ජනවාරි 1 සිට 2023 නොවැම්බර් 14 දක්වා මාස 21ක කාලය තුළ රුපියල් 296,566,444.76ක් වටිනා දේපළ හා මුදල් සම්පත් සොයාගත් නමුත්, ඒවා ලබාගත් ආකාරය හෙළිදරව් කිරීමට අපොහොසත් වූ බව චෝදනා කර ඇත.

ඒ අතරින් රුපියල් 275,302,616.06ක වටිනාකමකින් යුත් සම්පත් විශේෂයෙන් සැකයට ලක් වී ඇති අතර, සම්පත් ලබාගත් ආකාරය පැහැදිලි කිරීමට ඔහුට නොහැකි වී තිබේ.

අල්ලස් කොමිසම අනාවරණය කර ඇත්තේ, රමිත් සතු වත්කම් අතර කොළඹ 07 ධර්මපාල මාවතේ පිහිටි සුඛෝපභෝගී නිවාස සංකීර්ණයක නිවාස දෙකක් (වටිනාකම රුපියල් කෝටි 14.5ක්), රුපියල් එක්කෝටි අසූ ලක්ෂයකට අධික වටිනාකමකින් යුත් Discovery Jeep රථයක්, රමිත් සහ ඔහුගේ බිරිඳ සතු බැංකු ගිණුම් 8ක් සහ තැන්පතු ද ඇතුළත් බවය.

රමිත් රඹුක්වැල්ල, කෙහෙලිය රඹුක්වැල්ල මහතා සෞඛ්‍ය අමාත්‍ය ධුරය දරන සමයේ, ඔහුගේ පෞද්ගලික ලේකම්වරයා ලෙස කටයුතු කළේය. එම කාලය තුළ මෙවන් සම්පත් සොයාගත් බව අධිචෝදනා වලින් දැක්වේ.

අල්ලස් කොමිසම දූෂණ විරෝධී පනත යටතේ මෙම අධිචෝදනා ගොනු කර ඇති අතර, වැඩිදුර විමර්ශන ද පවතී.