කෙහෙල්බද්දර පද්මේ ඇතුළු පාතාල නායකයින් අද දිවයිනට !

මහජන ආරක්ෂක අමාත්‍ය ආනන්ද විජේපාල මහතා සඳහන් කළේ, කෙහෙල්බද්දර පද්මේ ඇතුළු සංවිධානාත්මක අපරාධ කල්ලි නායකයින් 5 දෙනෙකු රැගත් ගුවන් යානය අද (30) සවස කටුනායක බණ්ඩාරනායක ජාත්‍යන්තර ගුවන් තොටුපළට ළඟා වන බවයි.

මෙම පිරිස ඉන්දුනීසියාවේ ජකර්තා නුවර සිට පිටත්ව එන අතර, ඔවුන් මෙරටට භාර දීමට ඉන්දුනීසියානු රජයේ සහයද ලබා තිබේ.

අත්අඩංගුවට ගෙන එන පාතාලකරුවන් වන්නේ, කෙහෙල්බද්දර පද්මේ, කමාන්ඩෝ සලින්ද (පිට්ටුවා), පානදුරේ නිලංග, බැකෝ සමන්, තැඹිලි ලහිරු යන අයයි.

මෙම පිරිස ඉන්දුනීසියාවට ගොස් සිටින බස්නාහිර පළාත් උතුරු දිසා අපරාධ කොට්ඨාසයේ අධ්‍යක්ෂ සහකාර පොලිස් අධිකාරි රෝහන් ඕලුගල සහ අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරිවරයාගේ අධීක්ෂණය යටතේ, ඉන්දුනීසියානු පොලිසියගේ විශේෂ කණ්ඩායමක් මඟින් රැගෙන පැමිණෙයි.

ඉන්දුනීසියාවේදී පැවති විමර්ශන කටයුතු ඉක්මනින් අවසන් වූ බැවින්, මුල් සැලසුම අනුව හෙට දිනයේ රැගෙන එන්නට නියමිතව තිබූ මෙම අපරාධකරුවන් අද දිනයේම ශ්‍රී ලංකාවට ගෙන ඒමට හැකිවී ඇත.

මේ අනුව, අපරාධ පරීක්ෂණ දෙපාර්තමේන්තුව (CID) සහ පොලිස් විශේෂ කාර්ය බලකායේ (STF) කණ්ඩායම් මේ වනවිට කටුනායක ගුවන් තොටුපළ පරිශ්‍රය තුළ සහ පිටත ආරක්ෂාව තර කර සිටින බව වාර්තා වේ.