අද (30) උදෑසන රුසියාවේ නැගෙනහිර වෙරළ තීරයට 8.8ක ප්රබල භූමිකම්පාවක් බලපා ඇති අතර, එයින් කම්චැට්කා අර්ධද්වීපයට අඩි 13ක් (මීටර 4ක් පමණ) උසැති සුනාමි රළක් කඩා වැදී ඇති බව විදෙස් මාධ්ය වාර්තා කරයි.
එක්සත් ජනපද භූ විද්යා සමීක්ෂණය (USGS) අනුව, මෙම භූමිකම්පාව රුසියාවේ පෙට්රොපව්ලොව්ස්ක්-කම්චැට්ස්කි නගරයේ සිට සැතපුම් 85ක් (කිලෝමීටර 137ක්) පමණ දුරින්, කිලෝමීටර 19ක ගැඹුරකින් සිදුවී ඇත.
මෙම ප්රබල භූමිකම්පාවෙන් පසුව ජපානයේ වෙරළබඩ ප්රදේශ සඳහා ද සුනාමි අනතුරු ඇඟවීම් නිකුත් කර තිබේ. ජපාන කාලගුණ විද්යා ඒජන්සිය අනතුරු අඟවන්නේ මීටර 1ක් දක්වා උසැති රළ ඇති විය හැකි බවයි.
මීට අමතරව, හවායි දූපත් සහ ඇලස්කාවේ ඇලූටියන් දූපත්හි කොටස් සඳහා ද සුනාමි අනතුරු ඇඟවීමේ නිවේදනයක් නිකුත් කිරීමට පියවර ගෙන ඇති බව විදෙස් මාධ්ය වාර්තා වැඩිදුරටත් සඳහන් කරයි. මෙම සිදුවීමෙන් සිදුවූ හානි පිළිබඳව මෙතෙක් වාර්තා වී නොමැත.
