ජාතික අධ්‍යාපන විද්‍යා පීඨවල ඉගෙනුම ලබන ගුරු ශික්ෂණලාභීන්ට පීඩනයෙන් තොර ඉගෙනුම් පරිසරයක් නිර්මාණය කිරීම සහ අධ්‍යාපන පීඨවල සමස්ත ගුණාත්මකභාවය ඉහළ නැංවීම සඳහා ක්‍රියාකාරී සැලැස්මක් දියත් කරන බව අධ්‍යාපන හා උසස් අධ්‍යාපන නියෝජ්‍ය අමාත්‍ය, වෛද්‍ය මධුර සෙනෙවිරත්න මහතා පවසයි.
ඊයේ (ජූලි 18) බත්තරමුල්ල අධ්‍යාපන අමාත්‍යාංශ පරිශ්‍රයේදී පැවති ජාතික අධ්‍යාපන විද්‍යා පීඨවල පීඨාධිපතිවරුන් සමඟ පැවති සාකච්ඡාවකදී නියෝජ්‍ය අමාත්‍යවරයා මේ බව ප්‍රකාශ කළේය. දිවයිනේ සියලුම අධ්‍යාපන විද්‍යා පීඨවල පීඨාධිපතිවරුන් මෙම සාකච්ඡාවට සහභාගී වූ අතර, එක් එක් පීඨයට අදාළ අධ්‍යයන හා අනධ්‍යයන ගැටලු මෙන්ම යටිතල පහසුකම් සංවර්ධනය සම්බන්ධ ගැටලු සාකච්ඡා කිරීමට මෙහිදී අවස්ථාව ලැබිණි.
ගුරු ශික්ෂණලාභීන්ට වඩාත් ගුණාත්මක අධ්‍යයන පරිසරයක් නිර්මාණය කිරීම සඳහා මෙතෙක් අවධානයට ලක් නොවූ ගැටලු කෙරෙහි තම විශේෂ අවධානය යොමු කරන බව වෛද්‍ය සෙනෙවිරත්න මහතා මෙහිදී අවධාරණය කළේය. එසේම, සුවිශේෂී ගැටලු පවතින විද්‍යා පීඨවල නිරීක්ෂණ චාරිකා සිදු කර කඩිනම් විසඳුම් ලබා දීමට කටයුතු කරන බවද ඔහු වැඩිදුරටත් පැවසීය.
මෙම නව වැඩපිළිවෙළ මගින් ගුරු අධ්‍යාපනයේ ගුණාත්මකභාවය සැලකිය යුතු ලෙස ඉහළ නැංවීමට අපේක්ෂා කෙරේ
