මෙරට ඩිජිටල් සේවා සඳහා ඔක්තෝබර් 01 වැනිදා සිට නව බද්දක් පැනවූ බවට වන ප්‍රකාශ අසත්‍ය බව ආර්ථික සංවර්ධන නියෝජ්‍ය අමාත්‍ය මහාචාර්ය අනිල් ජයන්ත ප්‍රනාන්දු පවසයි.
මාධ්‍ය වෙත ප්‍රකාශයක් නිකුත් කරමින් නියෝජ්‍ය අමාත්‍යවරයා සඳහන් කළේ, 2025 අයවැය සඳහා ආදායම් ඇස්තමේන්තු කිරීමේදී මෙම කරුණ අයවැය ප්‍රකාශනයට ඉදිරිපත් කර සම්මත කරගත් බවයි. එහි නීතිරීති හා අණපනත් ගැසට් නිවේදන මගින් ප්‍රකාශයට පත් කළ යුතු බවත්, වැට් බදු පනත සංශෝධනය කර ප්‍රකාශයට පත් කළ ඩිජිටල් සේවා ගැසට් නිවේදනයද ඒ ආකාරයේ එකක් බවත් ඔහු වැඩිදුරටත් පැහැදිලි කළේය.
ඩිජිටල් සේවා සඳහා පනවන ලද වැට් බද්ද අලුතින් පනවන ලද්දක් නොවන බවත්, මීට පෙර වැට් බද්දට යටත් නොවූ ඩිජිටල් සේවා පමණක් වැට් බද්දට යටත් කර ඇති බවත් නියෝජ්‍ය අමාත්‍යවරයා අවධාරණය කළේය.
තවද, අධිකරණ ක්‍රියාමාර්ග ඇතුළු සියලු දේ අවසන් වීමෙන් පසු, අප්‍රේල් 01 වැනිදා සිට අයවිය යුතුව තිබූ බදු මුදල් ඔක්තෝබර් 01 වැනිදා සිට අය කිරීමට අධිකරණය අවසර ලබාදී ඇති බවද ඔහු සඳහන් කළේය.
