එක්සත් ජනපද ජනාධිපති ඩොනල්ඩ් ට්රම්ප් මහතා විසින් සිරියාවට එරෙහිව පනවා තිබූ සම්බාධක ජාලයක් අහෝසි කිරීමට නිල වශයෙන් විධායක නියෝගයකට අත්සන් තබා තිබෙනවා. මෙම තීරණයත් සමඟ සිරියානු පුද්ගලයන් සහ ආයතන 518 දෙනෙකු සම්බාධක ලැයිස්තුවෙන් ඉවත් කර ඇති බව විදෙස් මාධ්ය වාර්තා කරනවා.
මෙම ඓතිහාසික පියවර ගනු ලැබුවේ ජනාධිපති බෂාර් අල්-අසාද් බලයෙන් පහ කිරීමෙන් මාස හයකට වැඩි කාලයකට පසුව වීම විශේෂත්වයක්. ට්රම්ප්ගේ නියෝගය මගින් සිරියාව තුළ ආයෝජන සඳහා දොරටු විවර වී ඇති අතර, එය රටේ අනාගත සංවර්ධනයට විශාල පිටිවහලක් වනු ඇතැයි අපේක්ෂා කෙරේ.
එක්සත් ජනපද භාණ්ඩාගාරය නිවේදනයක් නිකුත් කරමින් කියා සිටියේ, ට්රම්ප්ගේ නියෝගයෙන් සිරියාවේ සංවර්ධනයට, එහි රජයේ ක්රියාකාරිත්වයට සහ රටේ සමාජ ව්යුහය නැවත ගොඩනැගීමට දායක වන ආයතනවලට සම්බාධක සහන ලබාදෙන බවයි.
