රට තුළ මහත් ආන්දෝලනයක් ඇති කළ ප්රමිතියෙන් තොර ප්රතිදේහ එන්නත් මිලදී ගැනීමේ සිද්ධිය සම්බන්ධයෙන් හිටපු සෞඛ්ය අමාත්ය කෙහෙළිය රඹුක්වැල්ල මහතාට එරෙහි නඩුවේ සාක්ෂිකරුවන් ලෙස හිටපු ජනාධිපති රනිල් වික්රමසිංහ මහතා ඇතුළු හිටපු කැබිනට් අමාත්යවරුන් පිරිසක් නම් කර තිබේ.
නීතිපතිවරයා විසින් කොළඹ ත්රිපුද්ගල මහාධිකරණ විනිසුරු මඩුල්ලක් හමුවේ කෙහෙළිය රඹුක්වැල්ල මහතා ඇතුළු විත්තිකරුවන් 12 දෙනෙකුට එරෙහිව අධිචෝදනා ගොනු කිරීමත් සමඟ මෙම තොරතුරු හෙළිදරව් විය. මෙම නඩුවේ සාක්ෂිකරුවන් ලෙස පුද්ගලයන් 350කට ආසන්න සංඛ්යාවක් නම් කර ඇති බව වාර්තා වේ.
මෙම සාක්ෂිකරුවන් අතර, හිටපු ජනාධිපති රනිල් වික්රමසිංහ මහතාට අමතරව, හිටපු අමාත්යවරුන් වන නිමල් සිරිපාල ද සිල්වා, විජයදාස රාජපක්ෂ, ඩග්ලස් දේවානන්ද, රොෂාන් රණසිංහ යන මහත්වරුන් ද සිටිති. ඊට අමතරව, ජාතික ඖෂධ නියාමන අධිකාරියේ සභාපති වෛද්ය ආනන්ද විජේවික්රම ඇතුළු වෛද්යවරුන් කණ්ඩායමක් ද සාක්ෂිකරුවන් ලෙස නම් කර ඇත.
මෙම නඩුවට අදාළව නඩු භාණ්ඩ 300කට ආසන්න සංඛ්යාවක් ද පැමිණිල්ල විසින් අධිකරණයට ඉදිරිපත් කර තිබේ.
නීතිපතිවරයා විසින් මෙම නඩුව මහජන වැදගත්කමක් සහිත නඩුකරයක් සේ සලකා එය විභාග කිරීම සඳහා ත්රිපුද්ගල මහාධිකරණ විනිසුරු මඩුල්ලක් නම් කරන ලෙස මීට පෙර අගවිනිසුරු වෙත ඉල්ලීමක් ඉදිරිපත් කර තිබුණි. ඒ අනුව, මෙම නඩුව විභාග කිරීම සඳහා මහේෂ් වීරමන්, ප්රදීප් අබේරත්න සහ අමාලි රණවීර යන මහාධිකරණ විනිසුරුවරුන්ගෙන් සමන්විත ත්රිපුද්ගල මහාධිකරණ විනිසුරු මඩුල්ලක් අගවිනිසුරු විසින් නම් කර ඇත. මෙම විනිසුරු මඩුල්ල ඉදිරියේ නීතිපතිවරයා විසින් අධිචෝදනා විත්තිකරුවන්ට එරෙහිව ඉදිරිපත් කර තිබේ.
හිටපු අමාත්ය කෙහෙළිය රඹුක්වැල්ල ඇතුළු විත්තිකරුවන්ට එරෙහිව නීතිපතිවරයා විසින් චෝදනා 13ක් එල්ල කර ඇත. මෙම චෝදනා මූලික වශයෙන් එල්ල වී ඇත්තේ, හියුමන් ඉමියුනොග්ලොබින් (Human Immunoglobulin) සහ රිටොප්සිමැප් (Rituximab) නැමැති ඖෂධ නොවන වෙනත් ද්රව්ය කුප්පි 6,195ක් සෞඛ්ය අමාත්යාංශයේ වෛද්ය සැපයුම් අංශයට සපයා, ශ්රී ලංකා ජනරජයේ මුදල් රුපියල් ලක්ෂ 1,444ක් වංක ලෙස ව්යපහරණය කිරීමට කුමන්ත්රණය කිරීම සහ එම මුදල් සාපරාධී සාවද්ය පරිහරණය සම්බන්ධයෙනි.
