රුපියල් ලක්ෂ 369 ක ආදායම් බදු නොගෙවීමට එරෙහිව දේශීය ආදායම් කොමසාරිස්වරයා විසින් පවරා තිබූ නඩුවකට අද (ජූනි 23) පෙනී නොසිටීම හේතුවෙන්, හිටපු පාර්ලිමේන්තු මන්ත්රී සජින් ද වාස් ගුණවර්ධන මහතා අත්අඩංගුවට ගෙන අධිකරණයට ඉදිරිපත් කරන ලෙසට කොළඹ මහේස්ත්රාත් අධිකරණය වරෙන්තු නිකුත් කර තිබෙනවා.
ව්යාපාරිකයෙකු වන සජින් ද වාස් ගුණවර්ධන මහතාට එරෙහිව මෙම නඩුව 2023 වසරේදී දේශීය ආදායම් කොමසාරිස්වරයා විසින් පවරනු ලැබුවේ, 2010-2012 වර්ෂවලට අදාළව ආදායම් බදු නොගෙවීම සම්බන්ධයෙන්. පැමිණිල්ල වෙනුවෙන් පෙනී සිටි දිනේෂ් පෙරේරා මහතා අධිකරණයට දන්වා සිටියේ, විත්තිකරුට සිතාසි භාර දී තිබුණ ද ඔහු අධිකරණයේ පෙනී සිට නොමැති බවයි.
ඉදිරිපත් වූ කරුණු සලකා බැලූ අතිරේක මහේස්ත්රාත් පවිත්රා සංජීවනී පතුරාජ මහත්මිය, විත්තිකරු අධිකරණයට ඉදිරිපත් කරන ලෙස නියෝග කරමින් මෙම වරෙන්තුව නිකුත් කළාය.
මෙම වරෙන්තුව නිකුත් කිරීමත් සමඟ සජින් ද වාස් ගුණවර්ධන මහතා කඩිනමින් අත්අඩංගුවට ගෙන අධිකරණයට ඉදිරිපත් කිරීමට නියමිතයි
