මාතලේ මහ නගර සභාවේ පාලන බලය ජාතික ජන බලවේගය (NPP) විසින් අද දින හිමි කර ගන්නා ලදී. මධ්‍යම පළාත් පාලන කොමසාරිස් චමිලා අතපත්තු මහත්මියගේ ප්‍රධානත්වයෙන් මාතලේ මහ නගර සභා රැස්වීම් ශාලාවේදී පැවති නගරාධිපති සහ උප නගරාධිපති තේරීම් ඡන්ද විමසීමේදී මෙම තීරණයට එළඹුණි.
ඡන්ද විමසීම ආරම්භ වී සුළු මොහොතකින් පසු සමගි ජන බලවේගය ඇතුළු මන්ත්‍රීවරුන් දස දෙනෙකු ඡන්දය වර්ජනය කර රැස්වීම් ශාලාවෙන් පිටතට ගියහ. කෙසේ වෙතත්, සභාවේ ඝන පූර්ණය පැවති බැවින් පළාත් පාලන කොමසාරිස්වරිය විසින් ඡන්ද විමසීම ඉදිරියට පවත්වාගෙන යන ලදී.
මෙම ඡන්ද විමසීමේ ප්‍රතිඵල අනුව, ජාතික ජන බලවේගය නියෝජනය කළ අශෝක කොට්ටහච්චි මහතා ඡන්ද 12ක් ලබා ගනිමින් මාතලේ මහ නගර සභාවේ නව නගරාධිපති ලෙස තේරී පත් විය. මීට අමතරව, කම්කරු කොංග්‍රසය නියෝජනය කළ එම්. මෝගන් මහතා උප නගරාධිපති ලෙස තේරී පත් වී තිබේ.
මාතලේ මහ නගර සභාවේ බලය ජාතික ජන බලවේගයට හිමිවීමත් සමඟ, මෙම නව පාලනය යටතේ නගරයේ ඉදිරි සංවර්ධන හා මහජන සේවා කටයුතු කෙසේ ක්‍රියාත්මක වේද යන්න පිළිබඳව බොහෝ දෙනාගේ අවධානය යොමුවී ඇත.
