ඉන්දියාවට ඔබ්බෙන්, කේරළ මුහුදු තීරයේදී අනතුරට ලක්වූ MSC Elsa 3 නෞකාවේ තිබූ අන්තරායකර බහාලුම් 13ක් හේතුවෙන් ශ්රී ලංකාවේ වෙරළ තීරයට දැඩි බලපෑමක් එල්ල වී ඇති බව පරිසර අමාත්යාංශය අනාවරණය කරයි. මෙම නෞකාවේ තිබූ ඇතැම් ද්රව්ය මේ වන විටත් මෙරට වෙරළ තීරයන්ට ගොඩගසා ඇති අතර, පවතින අයහපත් කාලගුණය හේතුවෙන් තත්ත්වය තවදුරටත් නරක අතට හැරිය හැකි බවට අනතුරු අඟවයි.
පරිසර අමාත්යාංශයේ අතිරේක ලේකම් ආර්.එච්.එම්.බී. අබේකෝන් මහත්මිය මාධ්ය හමුවකදී මේ බව සඳහන් කළාය. “MSC Elsa 3 නෞකාවේ තිබූ අන්තරායකර බහාලුම් 13ක් පිළිබඳව අපට තොරතුරු ලැබී තිබෙනවා. දැනටමත් එම ද්රව්යවලින් කොටසක් අපේ වෙරළට ගොඩගසා තිබෙනවා. අයහපත් කාලගුණයත් සමඟ තව තවත් ද්රව්ය ගොඩගැසීමේ අවදානමක් පවතිනවා,” ඇය පැවසුවාය.
මෙම තත්ත්වය හමුවේ, සමුද්රීය පරිසර ආරක්ෂණ අධිකාරියේ සාමාන්යාධිකාරී ජගත් ගුණසේකර මහතා පැවසුවේ වෙරළට ගොඩගසන ද්රව්ය ඉවත් කිරීමේ කටයුතු අද (ජුනි 13) සිට ආරම්භ කරන බවයි. “අපි අද සිටම මෙම ද්රව්ය ඉවත් කිරීමේ කටයුතු ආරම්භ කරනවා. මේ සඳහා අවශ්ය සියලු පියවර ගනිමින් සිටිනවා,” ගුණසේකර මහතා වැඩිදුරටත් පැවසීය.
මෙම අනතුර හේතුවෙන් ශ්රී ලංකාවේ වෙරළ තීරයට සහ සමුද්රීය පරිසරයට ඇති විය හැකි දිගුකාලීන බලපෑම් පිළිබඳව මේ වන විට පුළුල් අවධානයක් යොමුවී තිබේ. ආන්තරායකාරී ද්රව්ය හඳුනා ගැනීම, ඒවා ඉවත් කිරීම සහ පරිසරයට සිදුවන හානිය අවම කිරීම සඳහා කඩිනම් පියවර ගැනීම අත්යවශ්ය වේ.
