මැයි 9, 2022 දින සිදුවූ අරගලයේදී තම නිවෙස ඇතුළු දේපළට වූ හානි සදහා හිටපු කථානායක චමල් රාජපක්ෂ මහතාට ලබා දී ඇති වන්දි ගෙවීමක් සම්බන්ධයෙන් විමර්ශන සිදුවෙමින් පවතින අතර, ඉදිරියේදී ඔහු අත්අඩංගුවට ගනු ඇතැයි රාජ්ය පුවත්පතක් වන සිළුම්ණ වාර්තා කරයි.
2022 වසරේ මැයි මස 9 වැනිදා අරගලයේදී තිස්සමහාරාමයේ මාගම පිහිටි තම නිවෙස ඇතුළු දේපළට ගිනි තබා විනාශ කළ බවට ව්යාජ තොරතුරු ලබා දී රජයෙන් රුපියල් එක්කෝටි පනස්ලක්ෂ විසි දෙදහස් හයසීයක මුදලක් වංචනිකව ලබා ගැනීමේ චෝදනාව යටතේ ඔහුගෙන් අල්ලස් හෝ දූෂණ විමර්ශන කොමිෂන් සභාව විසින් ප්රශ්න කිරීමට නියමිතව ඇති අතර
තිස්සමහාරාමයේ මාගම පිහිටි එම දේපළ චමල් රාජපක්ෂට අයත් නොවන්නක් බවත්, එය වෙනත් අයකු නමින් ඇති බවත් මේ වන විට අනාවරණය වී ඇති අතර, එහි කිසිදු නිවෙසක් නොතිබූ බවත් එහි වී ගබඩාවක් පමණක් තිබී ඇති බවත් හෙළිව ඇත.
අදාළ දේපළ තමන් භුක්තිවිඳින බවට චමල් රාජපක්ෂ දිවුරුම් පෙත්සමක් ද ඉදිරිපත් කර තිබුණත්, එය සත්ය නොවන බවත්, 2023 ජූලි මාසයේ දී සිදුකළ වටිනාකම් වාර්තාවකින් පෙන්වා දී ඇත්තේ එහි මිලියන 14.8 ක් වටිනා නිවසක් සහ රු. 222,600 ක් වටිනා ගබඩාවකට හානි වූ බවය.
අදාළ දේපළ චමල් රාජපක්ෂට අයත් නොවන්නක් බව හෙළි වීමෙන් පසු, 2023.7.27 දිනැතිව රාජ්ය පරිපාලන ස්වදේශ කටයුතු පළාත් සභා හා පළාත් පාලන අමාත්යාංශයේ ලේකම් කේ.ඩී.එන්.ආර්. අසෝකගේ අත්සනින් යුතුව එම අමාත්යාංශයේ අතිරේක ලේකම් (පාර්ලිමේන්තු කටයුතු අංශ) ආර්.එම්.එන්.ඊ.කේ. රණසිංහ විසින් අදාළ ගෙවීම් තම විෂයපථය යටතේ කළ නොහැකි බව හානි පූරණය සඳහා වන කාර්යාලයේ අධ්යක්ෂ ජනරාල් වෙත දන්වා තිබේ.කෙසේ වෙතත් 2023.07.20 දිනැතිව තක්සේරු දෙපාර්තමේන්තුවේ තක්සේරුකරුවකු විසින් එහි නිවෙසක් තිබී ඇති බවත් එහි වටිනාකම රුපියල් 1,48,00,000ක් බවත් දැක්වෙන තක්සේරු වාර්තාවක් ඉදිරිපත් කර තිබේ.ඒ අනුව වී ගබඩාවේ හානිය වන රු. 222,600ක් හා නොතිබූ නිවෙසක් වෙනුවෙන් රු. 1,48,00,000ක් වශයෙන් රු. එක්කෝටි පනස්ලක්ෂ විසිදෙදහස් හයසීයක මුදලක් රජයෙන් ලබාගෙන ඇත.මෙම මුදල් ගෙවීම සම්බන්ධයෙන් නීතියට හා චක්රලේඛයන්ට පටහැණිව කටයුතු කළ රජයේ නිලධාරීන්ට එරෙහිවද ඉදිරියේදී නීතිමය ක්රියාමාර්ග ගැනීමට නියමිත බවද වැඩිදුරටත් සඳහන් විය
