කොළඹ අංක 5 අතිරේක මහේස්ත්‍රාත් අධිකරණය තුළදී ගණේමුල්ල සංජීව නමැත්තා ඝාතනය කිරීමේ සිද්ධියට අදාළව කොළඹ දිසා අපරාධ කොට්ඨාසය මගින් අත්අඩංගුවට ගත් බූස්ස බන්ධනාගාරයේ ජේලර්වරයෙකු මෙම මස 21වන දා දක්වා රක්ෂිත බන්ධනාගාරගත කරන ලෙස කොළඹ අතිරේක මහේස්ත්‍රාත් හර්ෂණ කැකුණවෙල ඊයේ (මාර්තු 17) නියෝග කළේ ය.
මනෝජ් උදය ශාන්ත නමැති සැකකාර ජේලර්වරයෙකු එසේ රක්ෂිත බන්ධනාගාරගත කෙරුණු අතර ඔහුගේ ජංගම දුරකතන වාර්තාවක් අධිකරණයට ඉදිරිපත් කරන ලෙසට ද අධිකරණයෙන් නියම විය.
කොළඹ දිසා අපරාධ කොට්ඨාසය මගින් අත්අඩංගුවට ගත් සැකකාර ජේලර්වරයා ඊයේ පස්වරුවේ අධිකරණයට ඉදිරිපත් කිරීමෙන් අනතුරුව එසේ රක්ෂිත බන්ධනාගාරගත කිරීමට නියම කෙරිණි.
ගණේමුල්ල සංජීව නමැත්තා මෙම ජේලර්වරයාගේ භාරකාරත්වය යටතේ බූස්ස බන්ධනාගාරයේ සිට කොළඹ අලුත්කඩේ අධිකරණය වෙත රැගෙන විත් ඇති නමුත් ඔහුගේ ආරක්ෂාව සම්බන්ධයෙන් සැකකාර ජේලර්වරයා කිසිදු සැලකිල්ලක් දක්වා නොමැති බවට සිදුකළ විමර්ශනවලදී කරුණු අනාවරණය වන බව ද එම විමර්ශන කොට්ඨාසය අධිකරණයට දැන්වීය.
සැකකාර ජේලර්වරයාගේ නොසැලකිලිමත්කම මත මෙම ඝාතනය සිදුව ඇති බව ත් සිය වගකීම හා රාජකාරිය පැහැර හැරීම හේතුකොටගෙන මෙම ඝාතනය සිදුව තිබෙන බවට තොරතුරු අනාවරණය වන බව ත් එම නිලධාරීහු අධිකරණය හමුවේ පැවසූහ.
