අදානි ගිවිසුම නිසා කොළඹ වරායට වෙන සමාගම්වලට එන්න බැරිලු

කොළඹ වරායේ නැඟෙනහිර බහාලුම් පර්යන්තය ක්‍රියාත්මක කිරීම සඳහා ශ්‍රී ලංකා වරාය අධිකාරිය සමඟ හවුල් වීමට ප්‍රධාන නැව් සමාගම් කැමැත්ත පළකර ඇති නමුත් අදානි සමාගම විසින් පවත්වාගෙන යනු ලබන බටහිර බහාලුම් පර්යන්තය සමඟ ඇති ගිවිසුම හේතුවෙන් ඊට බාධා මතුව ඇතැයි වාර්තා වේ.

බටහිර බහාලුම් පර්යන්තයේ කොන්ත්‍රාත්තුව ක්‍රියාත්මක වන දින සිට වසර හතක් සඳහා හෝ වරායේ සම්පූර්ණ බහාලුම් මෙහෙයවීම ඒකක මිලියන 5.5 ඉක්මවන තෙක්, තුන්වැනි පාර්ශවයකට කොළඹ වරායේ ඕනෑම නව සේවාවන් ක්‍රියාත්මක කිරීමට සෘජුව හෝ වක්‍රව ඉඩදීම මෙම ගිවිසුම මගින් ශ්‍රී ලංකා වරාය අධිකාරියට අවහිර කර තිබේ.

කොන්ත්‍රාත්තුවක් බලාත්මක වන දිනය වන්නේ, එය ක්‍රියාත්මක වන විට සහ ගිවිසුම තුළ ඇති වගකීම් ඉටුකිරීමට පටන් ගැනීමට අවශ්‍ය වූ දිනයයි.

මේ වන විට නැව් සමාගම් කිහිපයක්ම නව සේවාවන් දියත් කිරීමට ශ්‍රී ලංකා වරාය අධිකාරියට කැමැත්ත පළකර ඇතැයි වාර්තා වේ.

2021 දී, ගෝඨාභය රාජපක්ෂ පරිපාලනය ඉන්දියාව සහ ජපානය සමඟ නැගෙනහිර බහාලුම් පර්යන්තය සංවර්ධනය කිරීම සඳහා අත්සන් කළ 2019 අවබෝධතා ගිවිසුම අවලංගු කරන ලදී.

එහෙත් එය සම්පූර්ණයෙන්ම ශ්‍රී ලංකාවට අයිතිය පවතින පහසුකමක් ලෙස ක්‍රියාත්මක කිරීමට එවකට ආණ්ඩුව පොරොන්දු විය.