බදු වාර්තා ගොනු කිරීමට දී තිබු කාලය ඊයේ (නොවැම්බර් 30) දිනෙන් අවසන් වූ බැවින් අවසන් මොහොතේ බදු වාර්තා ගොනු කිරීමට උත්සාහ කළ පිරිස හේතුවෙන් දත්ත පද්ධතියේ තදබදයක් ඇති වී තිබේ.
දේශීය ආදායම් දෙපාර්තමේන්තුවේ ජ්‍යෙෂ්ඨ නිලධාරියකු පවසා තිබුණේ ඊයේ එක් අවස්ථාවක පුද්ගලයන් 16,000ක් පද්ධතියට ඇතුළු වී (ලොග් වී) ඔවුන්ගේ වාර්තා ගොනු කිරීමට උත්සාහ කර තිබූ බවයි.
මේ හේතුවෙන් අඩු බලැති පරිගණක තිබූ සමහර බදු ගෙවන්නන්ට සාර්ථකව කටයුතු කළ නොහැකි වී ඇති බව ද වාර්තා වේ.
උත්සාහයන් කිහිපයකින් පසු පද්ධතිය බිඳ වැටී ඇති බවට ඔවුන් බොහෝ දෙනා පැමිණිලි කර ඇත.
උතුරු නැගෙනහිර ගංවතුරෙන් පීඩාවට පත් වූ ප්‍රදේශ සහ විදුලිය නොමැති වූ සමහර ප්‍රදේශවල සිටි පිරිසට පද්ධතියට ප්‍රවේශ වීමට නොහැකි වූ සිද්ධීන්ද වාර්තා වී ඇත.
දේශීය ආදායම් දෙපාර්තමේන්තුව විසින් ආදායම් වාර්තා ගොනු කිරීම අන්තර්ජාලය හරහා සිදු කිරීම අනිවාර්යය කර ඇත.
දේශීය ආදායම් කොමසාරිස් ජනරාල්වරයාට අභියාචනයක් ඉදිරිපත් කිරීමෙන් එම වාර්තා අතින් ගොනු කිරීමට විශේෂ අවසරයක් ලබා ගත යුතුය.
ගොනු කිරීමේ ක්‍රමය ඔක්තෝබර් 1 වනදා සිට විවෘතව තිබී ඇති අතර එමනිසා ප්‍රමාණවත් කාලයක් ලබා දී තිබූ බව දේශීය ආදායම් දෙපාර්තමේන්තුවේ අදහසයි.
නියමිත දිනට පසුව බදු වාර්තා ගොනු කරන අය දඩයකට යටත් විය හැකිය.
පරිගණක පද්ධතියට අධික බරක් පැටවීම සහ ගංවතුර තත්ත්වය හේතුවෙන් දහස් ගණනකට නියමිත වේලාවට තම වාර්තා ගොනු කිරීමට නොහැකි වීම හේතුවෙන් ඒ සඳහා කාලය දීර්ඝ කිරීමක් කරන්නේද යන්න දේශීය ආදායම් දෙපාර්තමේන්තුව මෙතෙක් තහවුරු කර නැත.
