බෙහෙත් කතාවට නලින්ද බිලියනයක් වන්දි ඉල්ලයි

සෞඛ්‍ය අමාත්‍ය නලින්ද ජයතිස්ස මහතා විසින් ප්‍රකට යූටියුබ් ක්‍රියාකාරිකයෙකු වන ධර්මසිරි කාරියවසම් මහතා වෙත රුපියල් බිලියනයක වන්දි මුදලක් ඉල්ලා එන්තරවාසියක් යොමු කර තිබේ. ජාතික ඖෂධ නියාමන අධිකාරිය මඟින් මෑතකදී භාවිතය අත්හිටුවන ලද ආන්දෝලනාත්මක ඔන්ඩන්සෙට්‍රොන් එන්නත් ආනයනය කිරීම සම්බන්ධයෙන් අමාත්‍යවරයා වෙත එල්ල කළ අපහාසාත්මක ප්‍රකාශ මෙයට හේතු වී ඇත.

අදාළ යූටියුබ් නාලිකාව හරහා ප්‍රචාරය කළ වැඩසටහනක් මඟින් අමාත්‍යවරයා ඖෂධ සැපයුම්කරුවන් සමඟ එක්ව කුමන්ත්‍රණය කරන බවටත්, මෙම ඖෂධ ගැටලුව වසන් කිරීමට උත්සාහ කරන බවටත් අසත්‍ය තොරතුරු සමාජගත කර ඇති බව එන්තරවාසියේ සඳහන් වේ. මෙමඟින් අමාත්‍යවරයාගේ කීර්තිනාමයට සහ පෞරුෂයට දැඩි හානියක් සිදුව ඇති බව එහි වැඩිදුරටත් දක්වා ඇත.

මෙම අපහාසාත්මක ප්‍රකාශ සහ අසත්‍ය අන්තර්ගතයන් පළ කිරීම වහාම නතර කරන ලෙසත්, එසේ නොවන්නේ නම් ඉදිරියේදී අධිකරණමය ක්‍රියාමාර්ග ගන්නා බවත් අමාත්‍යවරයාගේ නීතිඥවරුන් මාර්ගයෙන් දන්වා තිබේ. රජයේ ඖෂධ ප්‍රතිපත්තිය සහ ජාතික ඖෂධ නියාමන අධිකාරියේ තීරණ විවේචනය කිරීමේ මුවාවෙන් පුද්ගලිකව තමන් වෙත මඩ ප්‍රහාර එල්ල කිරීම සම්බන්ධයෙන් අමාත්‍යවරයා මෙලෙස දැඩි ලෙස ප්‍රතිචාර දක්වා ඇත.