චීනයෙන් තායිවානයට අභියෝග

චීනය විසින් තායිවානයේ භෞමික මුහුදු සීමාව තුළ ව්‍යාජ ස්වයංක්‍රීය හඳුනාගැනීමේ පද්ධති (AIS) සංඥා විකාශනය කරමින්, විවිධ ආකාරයේ ආක්‍රමණයන්ට තායිවානයේ යුදමය ප්‍රතිචාර තක්සේරු කරමින් සිටින බව යුද අධ්‍යයන ආයතනය (Institute for the Study of War) විසින් ප්‍රකාශයට පත් කරන ලද වාර්තාවක් උපුටා දක්වමින් තායිපේ ටයිම්ස් පුවත්පත වාර්තා කරයි.

මෙම වාර්තාවට අනුව, මීට පෙර චීන ධීවර යාත්‍රා කිහිපයක් තායිවාන මුහුදේදී ව්‍යාජ AIS සංඥා නිකුත් කර ඇත. ඉන් එක් යාත්‍රාවක් රුසියානු යුද නැවක් අනුකරණය කළ අතර, තවත් යාත්‍රාවක් චීන නීතිය ක්‍රියාත්මක කරන යාත්‍රාවක් ලෙස පෙනී සිට ඇත.

ස්ටාර්බෝඩ් සමුද්‍රීය බුද්ධි අංශයේ දත්ත උපුටා දක්වමින් වාර්තාව පෙන්වා දෙන්නේ, අගෝස්තු මාසය පුරාම මින් ෂි යූ 06718 නම් චීන ධීවර බෝට්ටුවක් තායිවාන් සමුද්‍ර සන්ධිය හරහා යාත්‍රා කර ඇති බවයි. එහිදී වරින් වර එම යාත්‍රාවේ AIS පද්ධතිය සහ Hai Xun 15012 නම් නෞකාවක AIS පද්ධතිය එකවර ක්‍රියාත්මක කර ඇත. ‘හයි ෂුන්’ යාත්‍රා සාමාන්‍යයෙන් ක්‍රියාත්මක කරනු ලබන්නේ චීන සමුද්‍රීය ආරක්ෂක පරිපාලනය (CMSA) විසිනි.

එමෙන්ම, සැප්තැම්බර් 17 වන දින මින් ෂි යූ 07792 නම් තවත් ධීවර යාත්‍රාවක් තායිවානයේ උතුරු සුවිශේෂී ආර්ථික කලාපය තුළදී රුසියානු යුද නෞකාව 532 හි ව්‍යාජ සංඥාවක් යවා ඇති බවද වාර්තාවේ දැක්වේ.

විශේෂඥයන් පෙන්වා දෙන්නේ, මෙම ව්‍යාජ සංඥා විකාශනයන් හරහා චීනය, තායිවාන බලධාරීන්ගේ ව්‍යාකූලත්වය සහ ප්‍රතිචාර දැක්වීමේ වේගය පරීක්ෂා කිරීමට උත්සාහ දරන බවයි.