කොළඹ දිස්ත්‍රික්කයේ ජල කප්පාදුව සිදුවන්නේ මේ ලෙසයි

දිවයින පුරා පවතින දැඩි වියළි කාලගුණික තත්ත්වය හේතුවෙන් කලටුවාව සහ ලබුගම ජලාශවල ජල මට්ටම් පහළ බැස ඇති බැවින්, කොළඹ දිස්ත්‍රික්කයේ ප්‍රදේශ කිහිපයකට දින තුනකට වරක් ක්‍රියාත්මක වන පරිදි ජල කප්පාදුවක් හඳුන්වා දීමට ජාතික ජල සම්පාදන හා ජලාපවහන මණ්ඩලය පියවර ගෙන තිබේ. මෙම තීරණයට අනුව පාදුක්ක, හෝමාගම, පැලන්වත්ත සහ පන්නිපිටිය ඇතුළු ප්‍රදේශ රැසකට ඉදිරි දින කිහිපය තුළ වාරානුකූලව ජල සැපයුම අත්හිටුවීමට නියමිතය.

ඒ අනුව පාදුක්ක ප්‍රදේශය සඳහා ක්‍රියාත්මක ජල කප්පාදුව ඊයේ රාත්‍රී 8ට ආරම්භ වූ අතර එය අද රාත්‍රී 8 දක්වා පැය 24ක කාලයක් ක්‍රියාත්මක වේ. හෝමාගම ප්‍රදේශයට අද රාත්‍රී 8 සිට හෙට රාත්‍රී 8 දක්වා ජල සැපයුම අත්හිටුවන අතර, පැලැන්වත්ත ප්‍රදේශය සඳහා ජල කප්පාදුව හෙට රාත්‍රී 8 සිට අප්‍රේල් 5 වනදා රාත්‍රී 8 දක්වා ක්‍රියාත්මක කිරීමට මණ්ඩලය තීරණය කර ඇත.

මෙම ජල කප්පාදුව අදාළ ප්‍රදේශවලට දින තුනකට වරක් සිදු කිරීමට නියමිත අතර, ජල සැපයුම අත්හිටුවා නොමැති දිනවලදී පාරිභෝගිකයන්ට අඛණ්ඩව ජලය ලබා දීමට කටයුතු යොදා තිබේ. මේ අනුව ඉදිරි කාලසටහනට අනුව පාදුක්ක ප්‍රදේශයට අප්‍රේල් 7 වනදා ද, හෝමාගම ප්‍රදේශයට අප්‍රේල් 8 වනදා ද සහ පැලැන්වත්ත ප්‍රදේශයට අප්‍රේල් 9 වනදා ද යළිත් වරක් මෙලෙස ජල සැපයුම අත්හිටුවීමට නියමිත බව ජාතික ජල සම්පාදන හා ජලාපවහන මණ්ඩලය වැඩිදුරටත් අවධාරණය කරයි.