උත්සව සමය යුද හමුදා මූලස්ථානයේ විශේෂ මෙහෙයුම් මැදිරියක්

එළඹෙන උත්සව සමය තුළ මහජන ආරක්‍ෂාව සහ සාමය තහවුරු කරමින්, ජනතාවට බියකින් සැකයකින් තොරව උත්සව සැමරීමට අවශ්‍ය පසුබිම සකස් කිරීම සඳහා යුද හමුදා මූලස්ථානය කේන්ද්‍ර කරගනිමින් විශේෂ මෙහෙයුම් මැදිරියක් ස්ථාපිත කර තිබේ. ආරක්‍ෂක ලේකම්වරයාගේ සෘජු උපදෙස් මත ක්‍රියාත්මක වන මෙම ඒකකය උත්සව සමය නිමාවන තෙක් අඛණ්ඩව ක්‍රියාත්මක වීමට නියමිතය.

මෙම මෙහෙයුම් මැදිරිය ත්‍රිවිධ හමුදාව සහ ශ්‍රී ලංකා පොලිසිය අතර සමීප සහයෝගීතාවක් පවත්වාගෙන යන ප්‍රධාන සම්බන්ධීකරණ මධ්‍යස්ථානය ලෙස කටයුතු කරනු ඇත. උත්සව සමයේදී රට පුරා සිදුවන ආරක්‍ෂක ක්‍රියාවලීන් එකම මධ්‍යස්ථානයක සිට නිරීක්ෂණය කිරීමත්, ඒ ඒ අංශ අතර තොරතුරු හුවමාරුව කාර්යක්ෂම කිරීමත් මෙහි මූලික අරමුණ වී තිබේ.

උත්සව සමය තුළ මතු විය හැකි ඕනෑම ආරක්‍ෂක අභියෝගයකදී හෝ හදිසි තත්ත්වයකදී කඩිනම් සහ විධිමත් ප්‍රතිචාර දැක්වීම සහතික කිරීම මෙම ඒකාබද්ධ යාන්ත්‍රණයේ සුවිශේෂී ලක්ෂණයකි. කාලෝචිත තීරණ ගැනීම සහ සියලුම ආරක්‍ෂක අංශවල මෙහෙයුම් සූදානම උපරිම මට්ටමක පවත්වාගෙන යාම සඳහා මෙමඟින් පහසුකම් සැලසෙනු ඇත.

මෙම විශේෂ වැඩපිළිවෙළ හරහා උත්සව සමය පුරා මහජන ජීවිත සුරක්‍ෂිත කිරීමටත්, රජයේ සහ පෞද්ගලික දේපළවලට සිදුවිය හැකි හානි වළක්වා ගැනීමටත් ආරක්‍ෂක බලධාරීන්ට හැකියාව ලැබේ. ජනතාවට කිසිදු බාධාවකින් තොරව සාමකාමීව සිය ආගමික සහ සංස්කෘතික උත්සව සැමරීමට අවශ්‍ය සුරක්‍ෂිත පරිසරය පවත්වාගෙන යාම රජයේ ප්‍රධාන අභිප්‍රාය වී තිබේ.