විමල් වීරවංශට එරෙහි අල්ලස් නඩුව විභාගයට දින දෙයි

අමාත්‍යවරයකු ලෙස කටයුතු කරමින් රුපියල් මිලියන 75 කට ආසන්න වත්කම් සහ මුදල් අයථා ලෙස අත්පත් කර ගත්තේ යැයි චෝදනා කරමින් හිටපු අමාත්‍ය විමල් වීරවංශ මහතාට එරෙහිව අල්ලස් කොමිසම විසින් ගොනුකර තිබූ නඩුව දෙසැම්බර් 18 වැනිදා සහ ජනවාරි 20 වැනිදා යන දිනවල විභාගයට ගැනීමට කොළඹ මහාධිකරණය අද (22) නියෝග කළේය.

කොළඹ මහාධිකරණ විනිසුරු මොහොමඩ් මිහාල් මහතා විසින් මෙම නියෝගය නිකුත් කරන ලදී.

නඩුව අද කැඳවූ අවස්ථාවේදී විත්තිකාර හිටපු අමාත්‍ය විමල් වීරවංශ මහතා අධිකරණය හමුවේ පෙනී සිටියේය.

අල්ලස් කොමිසම වෙනුවෙන් පෙනී සිටි අතිරේක සොලිසිටර් ජෙනරාල් අසාද් නවාවි මහතා අධිකරණයට දන්වා සිටියේ, මෙම නඩුවට අදාළව විත්තිය වෙත ලබාදිය යුතු ලේඛන සියල්ල මේ වන විට ලබාදී අවසන් බවයි.

විත්තිය වෙනුවෙන් පෙනී සිටි ජනාධිපති නීතිඥ අනුර මැද්දේගොඩ මහතා, අදාළ ලේඛන පරීක්ෂාවට ලක් කිරීමට කාලයක් අවශ්‍ය බව පවසමින් විභාගය සඳහා දිනයක් ලබා දෙන ලෙස ඉල්ලා සිටියේය.

ඒ අනුව, කරුණු සලකා බැලූ විනිසුරුවරයා නඩුව විභාගයට ගැනීම සඳහා දෙසැම්බර් 18 සහ ජනවාරි 20 යන දින නියම කරන ලදී.

මෙම නඩුව ගොනුකර ඇත්තේ 2010 වසරේ සිට 2015 වසර දක්වා කාල සීමාව තුළ රජයේ අමාත්‍යවරයකු වශයෙන් කටයුතු කරමින් සිය නීත්‍යානුකූල ආදායම ඉක්මවා රුපියල් මිලියන 75 කට ආසන්න වත්කම් සහ මුදල් අත්පත් කර ගැනීම තුළින් අල්ලස් පනත යටතේ වරදක් සිදු කළේ යැයි චෝදනා කරමිනි.