අඩාල වූ රෝහල් සහ නිවාස ව්‍යාපෘති රැසක් යළි ඇරඹෙයි

පසුගිය කාලසීමාව තුළ රටේ පැවති කොවිඩ් වසංගතය සහ ආර්ථික අර්බුදය හේතුවෙන් අතරමග නතර වී තිබූ ප්‍රධාන පෙළේ රෝහල් ඉදිකිරීම් සහ නිවාස ව්‍යාපෘති රැසක් කඩිනමින් ආරම්භ කිරීමට අමාත්‍ය මණ්ඩල අනුමැතිය හිමිව තිබේ. ජනතාවට වඩාත් කාර්යක්ෂම සෞඛ්‍ය සේවාවක් සහ නාගරික නිවාස පහසුකම් සැලසීමේ අරමුණින් මෙම යෝජනා ඉදිරිපත් කර ඇත.

ඒ අනුව දිවයින පුරා ප්‍රධාන රෝහල් අටක ඉදිකිරීම් කටයුතු යළි ආරම්භ කිරීමට නියමිතය. කෑගල්ල මූලික රෝහලේ සහ හලාවත දිස්ත්‍රික් මහ රෝහලේ හදිසි ප්‍රතිකාර ඒකක, රත්නපුර ශික්ෂණ රෝහලේ හෘද රෝග ප්‍රතිකාර ගොඩනැගිල්ල, කරාපිටිය ශික්ෂණ රෝහලේ මහල් 10 කින් යුත් ශල්‍ය වාට්ටු සංකීර්ණය සහ පොළොන්නරුව රෝහලේ ආඝාත ප්‍රතිකාර ඒකකය ඒ අතර ප්‍රධාන වේ. මීට අමතරව කළුබෝවිල සහ රාගම රෝහල්වල ද අත්හිටුවා තිබූ ගොඩනැගිලි ව්‍යාපෘති යළි වේගවත් කෙරෙනු ඇත.

නාගරික සංවර්ධන ක්ෂේත්‍රය යටතේ කොළඹ ප්‍රදේශයේ ප්‍රධාන නිවාස ව්‍යාපෘති දෙකක ඉතිරි වැඩ නිම කිරීමට ද කැබිනට් අනුමැතිය ලැබී තිබේ. කොළඹ 07 ටොරින්ටන් මාවතේ නිවාස ඒකක 115 කින් යුත් ව්‍යාපෘතියේ කටයුතු සීමාසහිත සතුට බිල්ඩර්ස් සමාගම වෙතත්, කිරුළපන කොළඹගේ මාවතේ නිවාස ඒකක 615 කින් යුත් දැවැන්ත නිවාස ව්‍යාපෘතියේ ඉතිරි වැඩ නිම කිරීමේ කොන්ත්‍රාත්තුව ඇක්සස් ඉංජිනියරින් සමාගම වෙතත් පිරිනැමීමට තීරණය කර ඇත.

ආර්ථික සංවර්ධනයට දායකත්වයක් ලබා දීමේ පියවරක් ලෙස කොළඹ කොටුව චැතම් වීදියේ පිහිටි නාගරික සංවර්ධන අධිකාරිය සතු ඉඩමක් වසර 99 ක බදු පදනම මත මිශ්‍ර සංවර්ධන ව්‍යාපෘතියක් සඳහා ලබා දීමට ද රජය තීරණය කර තිබේ. මීට පෙර ඒ සඳහා ආයෝජකයෙකු ඉදිරිපත් නොවීම හේතුවෙන් පෞද්ගලික අංශයේ ආයෝජකයන්ගෙන් නැවත සංවර්ධන යෝජනා කැඳවීමට මෙහිදී අනුමැතිය හිමි විය.