වින්ග් කමාන්ඩර් නිර්මාල් සියඹලාපිටියගේ අවසන් කටයුතු හෙට

අයහපත් කාලගුණ තත්ත්වය හේතුවෙන් පීඩාවට පත් ජනතාව ගලවා ගැනීමේ මෙහෙයුම්වල නිරතව සිටියදී ලුණුවිල ප්‍රදේශයේ දී අනතුරට ලක් වූ හෙලිකොප්ටර් යානයේ ගුවන් නියමුවා ලෙස සිටි වින්ග් කමාන්ඩර් නිර්මාල් සියඹලාපිටිය මහතාගේ දේහය අද (දෙසැම්බර් 03) රත්මලානේ පිහිටි ඔහුගේ නිවසේ තැන්පත් කර තිබුණි.

වින්ග් කමාන්ඩර් නිර්මාල් සියඹලාපිටිය මහතාගේ අවසන් කටයුතු හෙට (දෙසැම්බර් 04) පස්වරුවේ ගල්කිස්ස පොදු සුසාන භූමියේදී සිදු කිරීමට නියමිතය.

කොළඹ විශ්වවිද්‍යාලයේ ජාත්‍යන්තර සබඳතා පිළිබඳ පශ්චාත් උපාධිය සාර්ථකව හැදෑරූ සියඹලාපිටිය මහතාගේ පශ්චාත් උපාධි සහතිකය සහ රතු ලෝගුව ඔහුගේ බිරිඳට භාර දීම කොළඹ විශ්වවිද්‍යාලයේ උප කුලපති මහාචාර්ය ඉන්දික කරුණාතිලක සහ සෙසු නිලධාරීන් අතින් අද දින සිදු කෙරිණි.

උප කුලපති මහාචාර්ය ඉන්දික කරුණාතිලක මහතා මෙහිදී අදහස් දක්වමින්, රටේ තත්ත්වය හේතුවෙන් අද දින පැවැත්වීමට නියමිතව තිබූ උපාධි ප්‍රදානෝත්සවය නොපැවැත් වූ බවත්, සියඹලාපිටිය මහතා මියගොස් නොසිටියේ නම් එම උපාධිය හිමිකර ගන්නා බවත් පැවසීය. ලංකා ඉතිහාසයේ මෙවැනි දෙයක් සිදුවූ පළමු වතාව මෙය බව ද ඔහු සඳහන් කළේය.

වින්ග් කමාන්ඩර් නිර්මාල් සියඹලාපිටිය මහතාගේ දේහයට අවසන් ගෞරව දැක්වීම සඳහා දේශපාලඥයන් සහ ආරක්ෂක අංශයේ ඉහළ නිලධාරීන් රැසක් සහභාගි වූහ.