ලෝක සෞඛ්‍ය සංවිධානය (WHO) විසින් මහජන සෞඛ්‍ය හදිසි අනතුරු ඇඟවීමක් ද නිකුත් කර ඇති වඳුරු උණ හෙවත් ‘mpox’ හි නව ප්‍රභේදය අසල්වැසි ඉන්දියාවට ද ව්‍යාප්තව ඇති බව විදෙස් මාධ්‍ය වාර්තා කරයි .
ඒ අනුව ‘mpox – clade 1b’ ලෙස හැඳින්වෙන එහි, පළමු ආසාදිතයා පිළිබඳව ඉන්දියාව නිවේදනය කර ඇති බව සඳහන් වේ .
එම ආසාදිතයා ඩුබායි සිට පැමිණි කේරළයේ මලප්පුරම් හි 38 හැවිරිදි පුද්ගලයෙකු බවට වැඩිදුරටත් සඳහන් වේ .
ආසාදිතයා රෝහලක ප්‍රතිකාර ලබමින් පසුවන අතර එම පුද්ගලයා ඇසුරු කළ අය සොයා බලා නිරීක්ෂණය කරමින් සිටින බව එරට සෞඛ්‍ය අංශ නිවේදනය කර ඇත .
වඳුරු උණ හෙවත් ‘mpox’, වේදනාකාරී සමේ තුවාල ඇති කරන බෝවන වෛරසයකි. වඳුරු උණ සේ ම එහි නව ප්‍රභේදය ද සොයාගනු ලැබුවේ අප්‍රිකා කලාපයෙනි. පසුව එය ස්වීඩනය, තායිලන්තය සහ පාකිස්තානය ඇතුළු අප්‍රිකානු මහාද්වීපයෙන් පිටත රටවලට ද ව්‍යාප්ත වීම සිදුවිය.
ඒ අනුව මීට ඉහත mpox ආසාදිතයින් පිළිබඳව ඉන්දියාවෙන් වාර්තා වුවත්, වෛරසයේ නව ප්‍රභේදය සම්බන්ධයෙන් වාර්තා වූ පළමු අවස්ථාව වන්නේ මෙයයි
