සම්පත් මනම්පේරි පෑලියගොඩ අපරාධ කොට්ඨාසයට භාර දේ !

සංවිධානාත්මක පාතාල කණ්ඩායම් සමග එක්ව “අයිස්” මත්ද්‍රව්‍ය ජාවාරමේ සම්බන්ධය ඇති බවට චෝදනා එල්ල වී ඇති හිටපු ප්‍රාදේශීය සභා මන්ත්‍රී සම්පත් මනම්පේරි අත්අඩංගුවට ගෙන වැඩිදුර විමර්ශන සඳහා පෑලියගොඩ අපරාධ කොට්ඨාසයට භාර දී තිබේ.

පොලිස්පති ප්‍රියන්ත වීරසූරිය මහතාගේ නියෝගය මත සැකකරු ඊයේ (24) දින පෑලියගොඩ අපරාධ කොට්ඨාසයට භාර දුන් බව වාර්තා වෙයි. මනම්පේරි අධිකරණයට ඉදිරිපත් කිරීමෙන් පසු ඔහුගෙන් විමර්ශන කර ගැනීමේ කටයුතු මත්ද්‍රව්‍ය නාශක අංශයට ද භාර දී තිබුණි.

දැනට ඔහුට එරෙහිව සිදු කරන විමර්ශන කටයුතු, පෑලියගොඩ අපරාධ කොට්ඨාස අධ්‍යක්ෂ රුහන් උඩුගල මහතාගේ මූලිකත්වයෙන් ප්‍රධාන පොලිස් පරීක්ෂක ලින්ටන් සිල්වා මහතා සම්පූර්ණ කරමින් සිටී.

පෙර පෑලියගොඩ අපරාධ කොට්ඨාසය විසින් සිදුකළ ප්‍රශ්න කිරීමකදී, මනම්පේරිගේ තොරතුරු මත මිද්දෙණිය ප්‍රදේශයේ වළ දමා තිබූ අවි ආයුධ තොගයක් සොයාගැනීමටද සාර්ථක විය.

සම්පත් මනම්පේරි අවි ආයුධ ජාවාරම, මත්ද්‍රව්‍ය ජාවාරම සහ විවිධ පාතාල අපරාධ රැසකට සම්බන්ධය ඇති බවට චෝදනා එල්ල වී ඇති අතර, දකුණු පළාතේ සිදු වූ බොහෝ අපරාධ වලටද ඔහු සම්බන්ධ වී ඇති බව පොලිස් විමර්ශන හෙළි කරයි.

තවද, ඔහු පාතාල නායකයන් වන කෙහෙල්බද්දර පද්මේ, බැකෝ සමන් ඇතුළු කණ්ඩායම් නායකයන් සමග සමීප සම්බන්ධතාවයක් තබාගෙන සිටි බවද අනාවරණය වී තිබේ.