කැලණිය විශ්වවිද්‍යාලයෙන් අලුත් සහතිකපත්‍ර පාඨමාලාවක් ඇරඹේ

කැලණිය විශ්වවිද්‍යාලයේ සමාජීය විද්‍යා පීඨයේ දේශපාලන විද්‍යා අධ්‍යයන අංශය සහ එෆ්රියල් තරුණ ජාලයේ (AFRIEL Youth Network) ඒකාබද්ධ සහයෝගයෙන් පවත්වනු ලබන ‘සහභාගීත්ව ප්‍රජාතන්ත්‍රවාදය පිළිබඳ සහතික පත්‍ර පාඨමාලාවේ’ සමාරම්භක උත්සවය ඊයේ (නොවැම්බර් 02, 2025) සාර්ථකව පවත්වන ලදී. මෙම අවස්ථාවේදී, පාඨමාලාව සඳහා තෝරාගත් රජයේ ග්‍රාමීය ක්ෂේත්‍ර නිලධාරීන් පිරිසක් වෙනුවෙන් තෝරාගැනීමේ ලිපි ප්‍රදානය කිරීම ද සිදු විය.

විශ්වවිද්‍යාලය විසින් රාජ්‍ය පරිපාලන, පළාත් සභා සහ පළාත් පාලන අමාත්‍යාංශයේ සහයෝගය ඇතිව සිදු කළ කඩයිම් පරීක්ෂණයක් සහ සම්මුඛ පරීක්ෂණයකින් පසු ග්‍රාමීය මට්ටමේ ක්ෂේත්‍ර නිලධාරීන් 100 දෙනෙකු (ග්‍රාම නිලධාරීන්, ආර්ථික සංවර්ධන නිලධාරීන්, කෘෂිකර්ම පර්යේෂණ නිෂ්පාදන සහකාර, ගොවිජන සේවා නිලධාරීන් ඇතුළු) පළමු කණ්ඩායම් දෙක සඳහා තෝරාගෙන තිබේ.

පාඨමාලාවේ ප්‍රධාන අරමුණ වන්නේ මෙම නිලධාරීන් වෙත ප්‍රජාතන්ත්‍රවාදී පාලනය, යහපාලනය සහ සිවිල් සහභාගීත්වය පිළිබඳ ගැඹුරු දැනුමක් සහ ප්‍රායෝගික පුහුණුවක් ලබා දීමයි. පාඨමාලා සම්බන්ධීකාරක ආචාර්ය නදීකා දමයන්ති මහත්මිය අවධාරණය කළේ, මෙය ශ්‍රී ලංකාවේ ප්‍රජාතන්ත්‍රවාදී භාවිතාව ශක්තිමත් කරන රාජ්‍ය සේවකයන් බිහිකිරීමේ ප්‍රධාන පියවරක් බවයි.

මෙම වැඩසටහනට සහයෝගය දක්වන එෆ්රියල් තරුණ ජාලයේ සභාපති රවීන්ද්‍ර ද සිල්වා මහතා අදහස් දක්වමින්, ග්‍රාමීය රජයේ සේවයේ ප්‍රජාතන්ත්‍රීය වටිනාකම් සඳහා ආයෝජනය කිරීමට ලැබීම සතුටක් බව පැවසීය.

“අප රටේ ග්‍රාමීය රජයේ සේවයේ ප්‍රජාතන්ත්‍රීය වටිනාකම්, අවබෝධය සහ කැපවීම වෙනුවෙන් ආයෝජනය කිරීමට ලැබීම අපට මහත් සතුටක්… ඉදිරි වසර සඳහා මෙම පාඨමාලාව සඳහා මිලියන 8ක මුදලක් වෙන් කර තිබෙනවා වගේම මෙම පාඨමාලාවේ ඉදිරි සංවර්ධන කටයුතු කිරීමට බලාපොරොත්තු වනවා.”

ප්‍රධාන ආරාධිතයා ලෙස කැලණිය විශ්වවිද්‍යාලයේ සමාජීය විද්‍යා පීඨයේ පීඨාධිපති සහ වැඩබලන උපකුලපති මහාචාර්ය එම්. එම්. ගුණතිලක මහතා සහභාගී විය. එෆ්රියල් තරුණ ජාලයේ නියෝජ්‍ය විධායක අධ්‍යක්ෂ විමුක්ති දුෂාන්ත මහතා විසින් පාඨමාලාව සඳහා සකස් කරන ලද අතිරේක කියවීම් පොත් කට්ටලය දේශපාලන විද්‍යා අධ්‍යයන අංශයේ අංශාධිපති මහාචාර්ය ඔසන්ත තල්පාවිල මහතා වෙත භාර දෙන ලදී.

විශ්වවිද්‍යාලය සහ AFRIEL තරුණ ජාලය විශ්වාසය පළ කරන්නේ, ප්‍රජාතන්ත්‍රවාදය සහ යහපාලනය පිළිබඳ දැනුමෙන් සන්නද්ධ වන මෙම ක්ෂේත්‍ර නිලධාරීන් ශ්‍රී ලංකාවේ යහපත් පාලනයට ශක්තිමත් දායකත්වයක් ලබා දෙනු ඇති බවයි.