ප්‍රධාන ජලාශ කිහිපයක ජල මට්ටම් තවදුරටත් අඩු කරයි

ඉදිරි කාලය සඳහා ලබා දී ඇති වර්ෂා පුරෝකථනයන් අනුව, මේ වන විට දිවයිනේ ප්‍රධාන ජලාශ කිහිපයක පවතින ජල මට්ටම් තවදුරටත් අඩු කරමින් පවතින බව වාරිමාර්ග දෙපාර්තමේන්තුව පවසයි.

වාරිමාර්ග අධ්‍යක්ෂ ජල විද්‍යා හා ආපදා කළමනාකරණ ඉංජිනේරු එල්.එස්. සූරියබණ්ඩාර මහතාට අනුව, ජල මට්ටම් අඩු කිරීම සඳහා ජලය නිදහස් කරමින් පවතින ප්‍රධාන ජලාශ කිහිපයක් මෙසේය:

අනුරාධපුර දිස්ත්‍රික්කය: නාච්චදූව, රාජාංගන
කුරුණෑගල දිස්ත්‍රික්කය: දැදුරු ඔය
හම්බන්තොට දිස්ත්‍රික්කය: ලුණුගම්වෙහෙර, වෙහෙරගල
අම්පාර දිස්ත්‍රික්කය: සේනානායක සමුද්‍රය

කෙසේ වෙතත්, මෙම නිදහස් කරන ජල ප්‍රමාණයෙන් එම ජලාශවල පහළ ප්‍රදේශ සඳහා කිසිදු බලපෑමක් සිදු නොවන බව සූරියබණ්ඩාර මහතා සඳහන් කළේය.

ඉදිරියේදී වර්ෂාව ලැබීමේ හැකියාවක් පවතින බැවින්, තත්ත්වයන් නිරීක්ෂණය කිරීම සඳහා වාරිමාර්ග දෙපාර්තමේන්තුව සතුව පවතින කාර්යාල පැය 24ම විවෘත කර ඇති බවත්, ඉදිරියේදී ඇතිවිය හැකි තත්ත්වයන් සම්බන්ධව නිරන්තරයෙන් දැනුවත් කිරීම් සිදුකරන බවත් ඔහු පැවසීය.
මෝසම් වැසි මේ වන විට සක්‍රීය වී ඇති බව කාලගුණ විද්‍යා දෙපාර්තමේන්තුව සඳහන් කර ඇති බැවින් අවධානයෙන් සිටීම වැදගත්ය. එහෙත්, පවතින තත්ත්වයන් අනුව මේ දක්වා අවදානම් තත්ත්වයක් මතුව නැති බව ඉංජිනේරු සූරියබණ්ඩාර මහතා වැඩිදුරටත් සඳහන් කළේය.