ILT20 ක්‍රීඩා කරන ශ්‍රී ලාංකික ක්‍රීඩකයන් වහාම ආපසු කැඳවයි

ඩුබායි හිදී දැන් ක්‍රියාත්මක වන ‘ඉන්ටර්නැෂනල් ලීග්’ පන්දුවාර 20 තරගාවලියේ (ILT20) ක්‍රීඩා කරන සියලු ශ්‍රී ලංකා ක්‍රීඩකයන්ට තරගාවලිය අතහැර දෙසැම්බර් 20 වැනිදා වන විට ශ්‍රී ලංකාවට වාර්තා කරන මෙන් ශ්‍රී ලංකා ක්‍රිකට් ආයතනයෙන් දැනුම් දී ඇතැයි වාර්තා වේ.

අදාළ හදිසි කැඳවීමට හේතුව කුමක්දැයි එම ක්‍රීඩකයන් වෙත නිශ්චිතව දැනුම් දී නැතත්, ශ්‍රී ලංකා පිතිකරුවන්ට දඟ පන්දු යවන්නන් හමුවේ වැඩි යෙදීමක් ලබාදීම මූලික අරමුණු කරගනිමින් දැන් ක්‍රියාත්මක දේශීය ‘මේජර් ලීග් තුන් දින තරගාවලියට’ මෙම ක්‍රීඩකයන් යොදාගැනීම මෙම කැඳවීමේ අරමුණ බව නිල නොලත් ආරංචි මාර්ග මගින් පැවසිනි.

කෙසේ වුවද මෙම හදිසි කැඳවීම හේතුවෙන්, මේ වන විටත් තරගාවලියට සම්බන්ධව සිටින මෙරට ක්‍රීඩකයන් මෙන්ම මෙම සතියේදී තරගාවලියට එක්වීමට සියල්ල සූදානම් කරගෙන සිටි මෙරට සෙසු ක්‍රීඩකයන් කිහිපදෙනාද දැඩි අපහසුතාවකට ලක්ව ඇතැයි සැලවේ.

මේ වන විට පැතුම් නිස්සංක, මහීෂ් තීක්ෂණ, කමිඳු මෙන්ඩිස්, නුවන් තුෂාර සහ මතීෂ පතිරණ මෙම ILT20 තරගාවලියේ ක්‍රීඩා කරන අතර, දසුන් ශානක ඩුබායි කැපිටල්ස් කණ්ඩායමේ නායකත්වය ද දරනු ලබයි. මේ අතර වනිඳු හසරංග, දුෂ්මන්ත චමීර, කුසල් ජනිත් සහ මිලාන් රත්නායක මෙම සතිය ඇතුළත තරගාවලියට එක්වීමේ බලාපොරොත්තුවෙන් පසුවිය.

උද්ගත තත්ත්වය සම්බන්ධයෙන් අදහස් දැක්වූ ලෝක කුසලානලාභී ශ්‍රී ලංකා කණ්ඩායම් සාමාජිකයකු පවසා ඇත්තේ, ජාත්‍යන්තරයේ ඉහළින්ම සිටින ක්‍රීඩකයන් රැසක් තරග වදින මෙවැනි පන්දුවාර 20 තරග අත්දැකීමක් ක්‍රීඩකයන්ට අහිමි කරමින් ඔවුන්ව (රතු පන්දුවෙන් තරග වදින) දේශීය තුන් දින තරගාවලියක අත්දැකීම් අරමුණු කරගනිමින් මෙරටට කැඳවීම විහිළුවක් බවයි.