වසරේ මුල් මාස නවය තුළ ලංකාවේ FDI 138%කින් ඉහළට

ශ්‍රී ලංකාවට ගලා එන සෘජු විදේශ ආයෝජන (FDI) ප්‍රමාණය 2025 ජනවාරි සිට සැප්තැම්බර් දක්වා කාලය තුළ ඇමෙරිකානු ඩොලර් මිලියන 827ක් දක්වා සැලකිය යුතු ලෙස ඉහළ ගොස් ඇති බව ශ්‍රී ලංකා ආයෝජන මණ්ඩලය (BOI) වාර්තා කරයි. ආයෝජන සඳහා ලබාගත් විදේශ වාණිජ ණය ද මෙම අගයට ඇතුළත් වේ.

මෙම වර්ධනය 2024 වසරේ එම කාලයට සාපේක්ෂව සියයට 138ක අතිවිශාල වැඩිවීමක් වන අතර, එය ශ්‍රී ලංකාවේ ව්‍යාපාරික පරිසරය කෙරෙහි ආයෝජක විශ්වාසය වැඩි වී ඇති බවට සංඥාවකි.

ඇ.ඩො. මිලියන 827ක සමස්ත FDI ප්‍රමාණය පහත සඳහන් පරිදි මූලාශ්‍ර හතරකින් සමන්විත වේ:

කොටස් ප්‍රාග්ධනය: ඇ.ඩො. මිලියන 133

නැවත ආයෝජනය කළ රඳවාගත් ඉපැයීම්: ඇ.ඩො. මිලියන 132

අන්තර් සමාගම් විදේශීය ණය ගැනීම්: ඇ.ඩො. මිලියන 231

දිගුකාලීන විදේශ වාණිජ ණය: ඇ.ඩො. මිලියන 331

සමස්ත FDI වලින් ඇමෙරිකානු ඩොලර් මිලියන 124ක් 2025 වසරේ අත්සන් කරන ලද නව ව්‍යාපෘති ගිවිසුම් මඟින් ලැබී ඇති අතර, ඉතිරිය පවතින ව්‍යාපෘතිවලින් නැවත ආයෝජනය කිරීම සහ පුළුල් කිරීම තුළින් උත්පාදනය වී තිබේ.

මෙම ප්‍රගතිය මඟින් නව ආයෝජකයින්ගේ විශ්වාසය සහ ඔවුන්ගේ මෙහෙයුම් පුළුල් කිරීමට පවතින ආයෝජකයින්ගේ කැපවීම යන දෙකම පිළිබිඹු වන බව BOI වැඩිදුරටත් අවධාරණය කරයි.

තවද, 2025 වසරේ මුල් මාස නවය තුළ ආයෝජන මණ්ඩල ව්‍යාපෘති 163ක් ඔස්සේ දේශීය ආයෝජන වශයෙන් ඩොලර් මිලියන 326ක් ද වාර්තා වී තිබේ.