පොලිස් රාජකාරියට බාධා කළ කාන්තාව ‘DIGගේ නංගී’ නෙවේ

කොළඹ: උඩුගම්පොළ සතිපොළ ආසන්නයේ රථවාහන රාජකාරියේ නිරත පොලිස් නිලධාරීන්ට බාධා කරමින් හැසිරෙන කාන්තාවක් සම්බන්ධයෙන් සමාජ මාධ්‍යයේ සංසරණය වන වීඩියෝවට පොලීසිය කරුණු පැහැදිලි කර තිබේ.

පොලිස් මාධ්‍ය කොට්ඨාසය නිකුත් කළ නිවේදනය අනුව, රථවාහන වරදක් සම්බන්ධයෙන් පොලිස් නිලධාරීන් විසින් කාර් රථයක් නැවැත්වීමට සංඥා කිරීමේදී, රථය නොනවත්වා ධාවනය කර ඇත. පසුව රථ වාහන නිලධාරීන් විසින් පසුපස හඹා ගොස් උඩුගම්පොල ප්‍රදේශයේදී නවත්වා පරීක්ෂා කරන අවස්ථාවේදී මෙම කාන්තාව පොලිස් රාජකාරියට බාධා කරමින් හැසිරී ඇත.

අදාළ වීඩියෝවේ එම කාන්තාව පොලීසියේ උසස් නිලධාරියෙකුගේ නැගණිය යැයි නම පවසමින් පොලිස් නිලධාරීන්ගේ කටයුතුවලට බාධා කරනු ලබයි. කෙසේ වෙතත්, පොලිස් මාධ්‍ය කොට්ඨාසය පවසා සිටියේ, සැකකාර කාන්තාව ජ්‍යෙෂ්ඨ නියෝජ්‍ය පොලිස්පතිවරයෙකුගේ නැගණිය ලෙස සිදු කරන ප්‍රකාශය සම්පූර්ණයෙන් අසත්‍යයක් බවය. ඇයට එවැනි කිසිම සබඳතාවක් නැති බව ද එහි දැක්වේ.

අනතුරුව මෙම ස්ථානයෙන් ද පොලිස් අණ නොතකා රථය ඉදිරියට ධාවනය කර ඇති අතර, මිනුවන්ගොඩ පොලිස් වසමේ පොල්වත්ත හන්දිය ප්‍රදේශයේදී රථය නවත්වා ගෙන සැකකාර කාන්තාව අත්අඩංගුවට ගෙන ගම්පහ පොලිස් ස්ථානය වෙත ඉදිරිපත් කර ඇත.

ඒ අනුව, සැකකාරිය අන්තරාදායක ලෙස රිය ධාවනය, අපරික්ෂාකාරී රිය ධාවනය, පොලිස් සංඥා නොතකා ධාවනය, සාපරාධී බලහත්කාරය පෑම සහ අන්අයෙකු ලෙස පෙනී සිටීම යන චෝදනා යටතේ අද (නොවැම්බර් 01) ගම්පහ මහේස්ත්‍රාත් අධිකරණය වෙත ඉදිරිපත් කිරීමට නියමිතය.