බැංකු කාඩ් මගින් බස් ගාස්තු ගෙවීම නොවැම්බර් 30 සිට

2025 නොවැම්බර් 30 වන දින සිට ක්‍රියාත්මක වන පරිදි, ටිකට්පත් නිකුත් කිරීමේ යන්ත්‍ර (Ticket Issuing Machines) සහිත බස් රථවල ගමන් ගන්නා මගීන්ට බැංකු කාඩ්පත් භාවිතයෙන් බස් ගාස්තු ගෙවීමේ පහසුකම ලබා දීමට රජය තීරණය කර තිබේ.

මේ බව ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක මහතා පාර්ලිමේන්තුවේදී අනාවරණය කළේය.

“බස් ටිකට් එකෙන් මාටියා ගහනවා කියන එක හරි ප්‍රසිද්ධ කාරණයක්. ලංකාවේ බස් කර්මාන්තය කරන්න බැරි එක් ප්‍රධාන හේතුවක් ඒක. කිසිම ආදායමක් ගන්න බැහැ ව්‍යාපාරිකයාට,” යනුවෙන් අමාත්‍යවරයා එහිදී සඳහන් කළේය.

ඒ අනුව, පුද්ගලික බස් හිමියන්ගේ සංගම්වලින් ලැබුණු ඉල්ලීමක් මත මෙම කාඩ්පත් මගින් ගෙවීමේ ක්‍රමය (Card Payment System) හඳුන්වා දීමට පියවර ගෙන ඇත. මීට පෙර වෙනම ප්‍රවාහන කාඩ්පත් හඳුන්වා දීමට තිබූ සැලසුම වෙනුවට, දැනට තිබෙන ඕනෑම බැංකු කාඩ්පතක් භාවිත කිරීමේ පහසුව මගීන්ට ලබා දීමට රජය තීරණය කර තිබේ.

අමාත්‍ය බිමල් රත්නායක මහතා තවදුරටත් සඳහන් කළේ ඩිජිටල් අමාත්‍යාංශය සහතිකයක් ලබා දී ඇති බැවින්, දැනට ටිකට් මැෂින් ඇති ඕනෑම බස් රථයක ගමන් ගන්නා ඕනෑම මගියෙකුට, තමන් සතු ඕනෑම බැංකුවක කාඩ්පතක් භාවිත කර ටිකට්පත සඳහා මුදල් ගෙවීමේ පහසුකම නොවැම්බර් 30 වන විට ලබා දීමට අපේක්ෂා කරන බවයි.

නව බැංකු කාඩ්පත් ගෙවීමේ ක්‍රමය හඳුන්වා දීම තුළින් බස් කර්මාන්තයේ ආදායම් කාන්දුවීම් වැළැක්වීමටත්, මගීන්ට නවීන සහ පහසු ගෙවීමේ ක්‍රමයක් ලබා දීමටත් රජය බලාපොරොත්තු වේ.