Buddy.net විශය නිර්දේශයට දැමූ ආචාර්යවරයා ගැන ගුරු සංගම්වලින් ප්‍රබල හෙළිදරව්වක්

නව අධ්‍යාපන ප්‍රතිසංස්කරණ යටතේ 6 ශ්‍රේණියේ ඉංග්‍රීසි විෂය සඳහා හඳුන්වා දුන් ඉගෙනුම් මොඩියුලයට ගැටලු සහගත වෙබ් අඩවියක් ඇතුළත් කිරීමේ සිද්ධිය මේ වන විට දැඩි දේශපාලන ආන්දෝලනයකට තුඩු දී තිබේ. කොළඹදී පැවැති මාධ්‍ය හමුවකදී අදහස් දක්වමින් ඒකාබද්ධ ගුරු සේවා සංගමයේ ලේකම් අමිල සඳරුවන් මහතා අනාවරණය කළේ, අදාළ මොඩියුලය සැකසීමට සම්බන්ධ වූ ප්‍රධාන ආචාර්යවරයෙකුගේ දියණිය පසුගිය පළාත් පාලන මැතිවරණයේදී ජාතික ජන බලවේගය (NPP) යටතේ තරග වැදුණු අපේක්ෂිකාවක බවයි.

ලිංගික අධ්‍යාපනය රටකට අවශ්‍ය වුවද එය නිසි ප්‍රමිතීන්ට අනුව සිදුවිය යුතු බවත්, මෙම ප්‍රතිසංස්කරණ ක්‍රියාවලිය සඳහා විශ්වවිද්‍යාලවල අධ්‍යාපන පීඨවල සිටින ප්‍රාමාණික වියතුන් සම්බන්ධ කර නොගැනීම මෙම බිඳ වැටීමට ප්‍රධාන හේතුව බවත් ලේකම්වරයා පෙන්වා දුන්නේය. පාසල් වෙත මෙම මොඩියුලය ලැබෙන තෙක් එහි අන්තර්ගතය පිළිබඳව කිසිදු බාහිර අධීක්ෂණයක් සිදු නොවූ බවත්, මෙහි පවතින්නේ හුදු සමලිංගික වෙබ් අඩවියක් පිළිබඳ ප්‍රශ්නයක් පමණක් නොව ඊට වඩා බරපතල තත්ත්වයක් බවත් ඔහු වැඩිදුරටත් සඳහන් කළේය.

මෙම මොඩියුලය සකස් කළ උපදේශක මණ්ඩලයේ සිටින ඇතැම් පුද්ගලයන්ගේ සුදුසුකම් පිළිබඳව ද මෙහිදී ප්‍රශ්න කෙරිණි. ජාතික අධ්‍යාපන ආයතනයේ සේවය කරන අදාළ ආචාර්යවරයාට එරෙහිව මූල්‍ය වංචා සහ අධ්‍යාපන සුදුසුකම් නොමැතිව තනතුරු දැරීම සම්බන්ධයෙන් විගණන වාර්තාවක් පවා පවතින බව සඳහන් කළ සඳරුවන් මහතා, මෙවැනි පුද්ගලයන් මෙම වගකිවයුතු කටයුත්ත සඳහා යොදා නොගන්නා ලෙස අග්‍රාමාත්‍ය හරිනි අමරසූරිය මහත්මියට ලිඛිතව දැනුම් දී තිබියදීත් එය නොසලකා හැරීම ගැටලු සහගත බව පවසා සිටියේය.

අධ්‍යාපන අමාත්‍යවරිය සහ ලේකම්වරයා මේ සම්බන්ධයෙන් අපරාධ පරීක්ෂණ දෙපාර්තමේන්තුවට පැමිණිලි කිරීම විහිළුවක් බවත්, වගකීම පැහැර හැරීම සම්බන්ධයෙන් ඔවුන් වහාම ඉල්ලා අස්විය යුතු බවත් ගුරු සේවා සංගමය අවධාරණය කරයි. ජාතික ජන බලවේගය සිය දේශපාලන බල ව්‍යාපෘතිය වෙනුවෙන් මෙවැනි පුද්ගලයින් ආරක්ෂා කරමින් සිටින්නේ දැයි ප්‍රශ්න කරන එම සංගමය, රජය මේ පිළිබඳව ජනතාවට පැහැදිලි පිළිතුරක් ලබා දිය යුතු බව ද කියා සිටියේය.