බොරැල්ල කනත්ත වටරවුම අසල ඊයේ (ජූලි 28) සිදුවූ මාරක රිය අනතුරට සම්බන්ධ දොඹකර රථ රියදුරු සහ එහි හිමිකරු අද (ජූලි 29) අලුත්කඩේ මහේස්ත්‍රාත් අධිකරණය හමුවට ඉදිරිපත් කිරීමට නියමිතයි.
ඊයේ පෙරවරු 7.45ට පමණ සිදුවූ මෙම අනතුරින් එක් පුද්ගලයෙක් එම ස්ථානයේදීම ජීවිතක්ෂයට පත් වූ අතර, තවත් 6 දෙනෙක් තුවාල ලැබූහ. කොළඹ ජාතික රෝහල් ආරංචිමාර්ග පවසන්නේ, තුවාල ලැබූවන් තවදුරටත් ප්‍රතිකාර ලබන අතර, ඉන් එක් අයෙකුගේ පාදයක් ඉවත් කිරීමටද සිදුවූ බවයි.
අනතුර සිදුවූ ආකාරය පිළිබඳව විමර්ශන පවත්වන බොරැල්ල පොලීසිය සඳහන් කළේ, දොඹකර රථය පාලනයෙන් ගිලිහී ගොස් යතුරුපැදි 6ක් සහ මෝටර් රථ 3ක් යටකරගෙන ධාවනය වී ඇති බවයි.
අනතුර සම්බන්ධයෙන් අත්අඩංගුවට ගත් 26 හැවිරිදි දොඹකර රථ රියදුරු වෛද්‍ය පරීක්ෂණයකට ලක් කිරීමේදී, ඔහු අනතුර සිදුවන අවස්ථාවේ ගංජා මත්ද්‍රව්‍ය භාවිත කර සිට ඇති බව අනාවරණය වී තිබේ. සිද්ධිය සම්බන්ධයෙන් වැඩිදුර පරීක්ෂණ ක්‍රියාත්මකයි.
